Дар ҷамъбасти даври шаҳрии Озмуни ҷумҳуриявии «Тоҷикистон — Ватани азизи ман» дар Ҳисор 44 нафар ғолиб шуданд

ДУШАНБЕ, 05.07.2024 /АМИТ «Ховар»/. Дар Ҳисор даври шаҳрии Озмуни ҷумҳуриявии «Тоҷикистон — Ватани азизи ман» ҷамъбаст гардида, 44 нафар ғолиб дониста шуда, ба даври минтақавӣ роҳхат гирифтанд, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор.

Бо анҷом ёфтани даври шаҳрии озмун дар Ҳисор бо иштироки ғолибон, устодону ҳаводорони довталабони озмун ҷамъомади тантанавӣ доир гардид. Дар ин маросим роҳбарияти шаҳри Ҳисор ғолибони даври шаҳриро табрик намуда, барои иштирок дар даври минтақавӣ комёбӣ таманно намуд.

Гуфта шуд, ки дар даври ибтидоии интихобӣ 965 нафар иштирок карда, 157 нафар ҳуқуқи иштирок ба даври шаҳриро пайдо намуданд. Аз ин шумора, 44 нафар ғолиб дониста шуданд ва ба даври минтақавӣ роҳхат гирифтанд. Ғолибон бо Диплому ҷоиза ва маблағҳои пулии мақомоти иҷроияи ҳокимияти давлатии шаҳр сарфароз гардонида шуданд.

Бояд гуфт, ки Озмуни ҷумҳуриявии «Тоҷикистон — Ватани азизи ман» ҳамасола таҳти сарпарастии Президенти Ҷумҳурии Тоҷикистон муҳтарам Эмомалӣ Раҳмон дар миқёси ҷумҳурӣ гузаронида мешавад.

Дарёфти истеъдодҳои нав дар соҳаи санъати мусиқӣ ва сарояндагӣ, тасвирӣ ва дизайн, баланд бардоштани маҳорати касбӣ ва зебоишиносӣ, тақвият бахшидан ба ҳунари баланди иҷрокунандагӣ, таблиғ ва эҳёи ҳунарҳои мардумӣ, муаррифии фарҳанги волои миллати тоҷик, эҳтиром ва арҷгузорӣ ба суннатҳои неки аҷдодӣ, сатҳи касбии асарҳои нави мусиқӣ, офарандагӣ, интихоби намунаҳои беҳтарини оҳангу суруд, коллексияҳо ва асарҳои рассомӣ, ки фарҳанги гузашта ва имрӯзаи миллати тоҷикро таҷассум менамоянд, аз ҳадафҳои озмун мебошанд.

АКС: Мақомоти иҷроияи ҳокимияти давлатии шаҳри Ҳисор