ИМТИҲОНҲОИ МАРКАЗОНИДАИ ДОХИЛШАВӢ. Дар мактаби №100-и шаҳри Душанбе масъулин бо рафти баргузории он шинос шуданд

ДУШАНБЕ, 04.07.2024. /АМИТ «Ховар»/. Вазири маориф ва илми мамлакат Раҳим Саидзода ва намояндагони сохтори марбута бо рафти баргузории имтиҳонҳои марказонидаи дохилшавӣ дар Муассисаи таҳсилоти миёнаи умумии №100 дар ноҳияи Шоҳмансури шаҳри Душанбе шинос гардиданд. Дар ин хусус АМИТ «Ховар» бо истинод ба Вазорати маориф ва илми Ҷумҳурии Тоҷикистон иттилоъ медиҳад.

Вазири маориф ва илм зимни суҳбат бо довталабон, падару модарон ва омӯзгорон иброз дошт, ки «таваҷҷуҳи Ҳукумати Ҷумҳурии Тоҷикистон нисбат ба соҳаи маориф сол то сол меафзояд. Махсусан, шароити хуби таҳсили донишҷӯён ва ба талаботу стандартҳои ҷаҳони муосир мутобиқ намудани муассисаҳои таҳсилоти миёна ва олии ҷумҳурӣ, тайёр намудани мутахассисони баландихтисос, таҳсили донишҷуён тибқи квотаи Президентӣ, ташкилу баргузории озмунҳои ҷумҳуриявӣ ва байналмилалӣ, ҳавасмандсозии донишҷуёни фаъол бо идрорпулӣ дар тӯли солҳои соҳибистиқлолӣ ҷиҳати рушди соҳаи маориф заминаи мусоид фароҳам овард».

«Тағйиру иловаҳои санадҳои ҳуқуқӣ ва меъёрии танзимкунанда дар соҳаи маориф ва илм, аз ҷумла, ҳатмӣ намудани зинаи сеюми таҳсилот, гузариш ба низоми баҳогузории даҳхола, мустаҳкам намудани равобити мактабу оила дар таълиму тарбияи кӯдак, ба бар намудани либоси миллӣ дар асоси Қонуни Ҷумҳурии Тоҷикистон «Дар бораи масъулият барои таълиму тарбияи кӯдак», Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» ва чанде дигар барои боз ҳам вусъат бахшидани маорифи миллӣ саҳми сазовор мегузорад», — афзуд Раҳим Саидзода.

АКС: Вазорати маориф ва илми Ҷумҳурии Тоҷикистон