Занони соҳибкори шаҳри Панҷакент ба машғулияти омӯзишии Академияи занони соҳибкор ҷалб шуданд

ДУШАНБЕ, 20.10.2024 /АМИТ «Ховар»/. 25 нафар занони соҳибкори шаҳри Панҷакент  дар доираи лоиҳаи ҳамкорӣ бо шарикони рушд ва Мақомоти иҷроияи ҳокимияти давлатии шаҳри Панҷакент ба машғулияти омӯзишии Академияи занони соҳибкор ҷалб карда шуданд.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент хабар медиҳад, дар мулоқот бо масъулони татбиқи лоиҳа изҳор шуд, ки дар доираи он барои  баланд бардоштани саводи молиявии занони соҳибкор омӯзонидани таҳияи бизнес-лоиҳаҳо ба онҳо, шиносоӣ бо таҷрибаи соҳибкории занон, аз ҷумла дар самти ҳунармандӣ дар Ҷумҳурии Узбекистон, иштироки занони соҳибкор дар намоишгоҳҳои байналмилалии савдо ва баргузории дигар чорабиниҳо пешбинӣ шудааст.

Ҳоло дар шаҳри Панҷакент 8 ҳазору 720 нафар соҳибкори инфиродӣ фаъолият менамоянд, ки нисбат ба ҳамин давраи соли гузашта 624 субъекти соҳибкорӣ зиёд аст. 1 ҳазору 140 нафар, ки қисми бештарашон занон ҳастанд, ба ҳунармандӣ машғул мебошанд.

АКС: Мақомоти иҷроияи ҳокимияти давлатии шаҳри Панҷакент