Вазорати нақлиёти Тоҷикистон тавсия медиҳад, ки ронандагон дар давраи зимистон эҳтиёткор бошанд

ДУШАНБЕ, 16.12.2024. /АМИТ «Ховар»/. Вазорати нақлиёти Ҷумҳурии Тоҷикистон ба ронандагони воситаҳои нақлиёт тавсия медиҳад, ки ҳангоми номусоид будани ҳаво аз сафар ба минтақаҳои кӯҳӣ худдорӣ кунанд. Дар ҳолати пеш омадани зарурат зимни сафар тавассути ағбаҳо ҳатман чархҳои тобистонаро ба чархҳои зимистона иваз кунанд, зеро воситаи нақлиёт бо чархҳои капронии тобистона дар фасли зимистон метавонад дар роҳ ба ҳолатҳои ногувор дучор шавад. Дар ин хусус АМИТ «Ховар» бо истинод ба Вазорати нақлиёти Тоҷикистон хабар медиҳад.

Ёдовар мешавем, ки Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон ҳушдор додааст, ки 16 декабр вазъи ҳаво номусоид шуда, боридани барф дар назар аст.

Дар баъзе минтақаҳои кӯҳии мамлакат ҳавошиносон баландшавии вазиши бодро бо суръати 17-22 метр дар як сония пешгӯӣ мекунанд, дар бархе ҷойҳо туман мефарояд. Дар мавзеъҳои кӯҳии шаҳру навоҳии тобеи ҷумҳурӣ, қисмати ғарбии Вилояти Мухтори Кӯҳистони Бадахшон ва дар роҳҳои автомобилгарди «Душанбе – Варзоб – Айнӣ – Хуҷанд», «Ваҳдат – Рашт – Тоҷикобод – Лахш», «Душанбе – Сангвор», «Шамсиддини Шоҳин – Дарвоз», «Ванҷ – Хоруғ», «Хоруғ – Ишкошим – Мурғоб» дараҷаи баланди яхбандӣ, фаромадани тарма ва сангрезӣ аз эҳтимол дур нест.

Вазорати нақлиёти Ҷумҳурии Тоҷикистон ҳама муассисаҳои нигоҳдории роҳҳоро вазифадор кардааст, ки ба таври шабонарӯзӣ кор карда, бо истифода аз техникаи мавҷуда роҳҳои автомобилгард ва роҳравҳои пиёдагардро сари вақт аз барф тоза намоянд.

Ба ронандагон инчунин тавсия дода мешавад, ки барои бехатарӣ дар минтақаҳои баландкӯҳ дар мошин занҷирҳои зиддилағзиш ва бел дошта бошанд.

Ин тадбирҳо бо мақсади бемамониат гузаштан аз ағбаҳо бо нақлиёти боркашу сабукрав ва ба вуҷуд наомадани танбашавии сунъӣ дар роҳҳои кӯҳӣ андешида мешаванд.

АКС аз бойгонӣ