ҲАРАКАТИ ҶУМҲУРИЯВИИ НИҲОЛШИНОНӢ. Дар шафати роҳҳои Ҷамоати деҳоти Халифа Ҳасани шаҳри Панҷакент беш аз 400 бех ниҳоли ороишӣ шинонида шуд

ДУШАНБЕ, 26.01.2025 /АМИТ «Ховар»/. Дар доираи Ҳаракати ҷумҳуриявии ниҳолшинонӣ ва бо мақсади сабзу хуррам намудани муҳити зист дар шафати роҳҳои Ҷамоати деҳоти Халифа Ҳасани  шаҳри Панҷакент  беш аз 400 бех ниҳолҳои ороишӣ шинонида шуданд, иттилоъ медиҳад АМИТ «Ховар» бо истинод ба хадамоти матбуоти  Раиси вилояти Суғд.

Мақомоти иҷроияи ҳокимияти давлатии шаҳри Панҷакент барои таъмини аҳолӣ ва ташкилоту идораҳои кишоварзӣ бо ниҳол тадбирҳои амалӣ меандешад.

Дар Хоҷагии фаръии давлатии ниҳолпарварии шаҳр беш аз 57,7 ҳазор бех ниҳоли дарахтони мевадиҳанда, аз қабили навъҳои гуногуни себ, нок, биҳӣ, шафтолую зардолу, олуболу, гелос, чормағз ва бодом, ангур парвариш мешаванд ва беш аз 30 ҳазор бехи он ду ва сесола мебошад.

Ҳамчунин дар хоҷагӣ беш аз 18 ҳазор бех ниҳолҳои сояафкану оришии 2 ва 3-сола мавҷуд буда, онҳо барои шинонидан омода мебошанд.

Дар хоҷагии ёрирасони шуъбаи ҳифзи муҳити зисти шаҳр беш аз 10 ҳазор бех ниҳолҳои шамшод, сарвиноз, маҷнунбед, навъҳои гуногуни дарахтони сӯзанбарг, гул ва павловния парвариш шуда, як қисми он барои шинонидан омода аст.

Сокинони шаҳр аз рӯзҳои мусоид истифода намуда, дар канори шоҳроҳ ва дигар минтақаҳо шинонидани ниҳолҳои сӯзанбарг ва сояафканро тибқи маслиҳати мутахассисон ва қоидаҳои агротехникӣ вусъат мебахшанд.

АКС: Хадамоти матбуоти раиси вилояти Суғд