Дар назди Донишгоҳи миллии Тоҷикистон Маркази омӯзиши паёмҳои Президенти Тоҷикистон таъсис мешавад

Январь 28, 2025 15:18

ДУШАНБЕ, 28.01.2025. /АМИТ «Ховар»/. Дар назди Донишгоҳи миллии Тоҷикистон Маркази омӯзиши паёмҳои Президенти Ҷумҳурии Тоҷикистон таъсис дода мешавад. Дар ин хусус имрӯз зимни нишасти матбуотӣ ректори донишгоҳ Эмомалӣ Насриддинзода иттилоъ дод.

Иброз гардид,  ки ин маркази омӯзишӣ барои донишҷӯён таъсис дода мешавад, то  муҳтавои паёмҳои Президенти Тоҷикистонро, ки инъикосгари самти сиёсати дохилӣ ва хориҷии ҷумҳурӣ мебошанд, ҳамаҷониба омӯзанд.

Бояд гуфт, ки аз 21 декабри соли 2022 бо мақсади эҳтиром ва арҷгузорӣ ба мактаби бузурги давлатдории Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо дастгирии Ҳукумати мамлакат, Дастгоҳи иҷроияи Президенти Ҷумҳурии Тоҷикистон ва ташаббуси роҳбарияти Донишгоҳи миллии Тоҷикистон дар назди донишгоҳ Маркази илмӣ-таҳқиқотии Пешвои миллат мавриди истифода қарор дорад.

Тавре директори Маркази илмӣ-таҳқиқотӣ Ҷамолиддин Шарифзода иброз намуд, дар ин марказ барои омӯзиши таҷрибаи нодири мактаби давлатдории Пешвои миллат  пажуҳиши илмӣ гузаронида мешавад. Ба марказ магистрантҳо, докторантҳо ва унвонҷӯёне, ки корҳои илмӣ-таҳқиқотиро дар самтҳои гуногун доир ба нақши Президенти Ҷумҳурии Тоҷикистон дар рушди ҳаёти сиёсии мамлакат анҷом медиҳанд, ҷалб мегарданд.

Дар Маркази илмӣ-таҳқиқотии Пешвои миллат осори банашррасидаи Президенти Тоҷикистон ва осори муҳаққиқону донишмандон, ки корномаҳои Пешвои миллатро инъикос менамоянд, ҷамъоварӣ шудаанд.

Тавре Президенти Ҷумҳурии Тоҷикистон муҳтарам Эмомалӣ Раҳмон дар Паём  ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» 28 декабри соли 2024 иброз намуданд, «дар зинаи таҳсилоти олӣ масъалаҳои сатҳу сифати таълим, дараҷаи касбии омӯзгорон ва истифодаи технологияҳои муосир аз ҷониби онҳо, ҷорӣ намудани технологияҳои рақамӣ дар раванди таълим, таҳкими заминаи моддиву техникӣ, ҳамкории байналмилалӣ, табодули илмии омӯзгорону донишҷӯён, корҳои илмию таҳқиқотӣ ва тадбирҳои тарбиявӣ ҳанӯз ба тақвият ниёз доранд».

Дар робита ба ин супориши Президенти Тоҷикистон  ректори Донишгоҳи миллии Тоҷикистон гуфт, ки «омили асосии баланд бардоштани сифати таҳсил- ин таъмини пурраи донишҷӯён дар дарс мебошад. Имрӯз гуфта метавонем, ки иштироки донишҷӯён дар дарсҳо ҳамарӯза 92 фоизро ташкил медиҳад. Ҳамчунин дар донишгоҳ барои баланд бардоштани сифати таҳсил ба масъалаи таъмини пурраи китобҳои дарсӣ, лексияҳои дарсӣ, таҷрибаомӯзии донишҷӯён, таъмини технологияи муосири таълим ва синфхонаҳои электронӣ диққати аввалиндараҷа равона мегардад».

Ректори донишгоҳ иброз дошт, ки устодони донишгоҳ тамоми саъю кӯшиш ва донишу малакаашонро ба пешбурди фаъолияти муназзами таълимӣ, илмию инноватсионӣ, тарбиявию идеологӣ ва анҷом додани таҳқиқоти илмии арзишманд барои пешрафти мамлакат равона намудаанд.

Фирӯза ДАВЛАТЗОДА,
АМИТ «Ховар»

АКС: АМИТ «Ховар» 

 

 

Январь 28, 2025 15:18

Хабарҳои дигари ин бахш

Ба тамоми шуъбаҳои маорифи Тоҷикистон беш аз 9 миллион китоби дарсӣ ва маводи таълимӣ дастрас карда мешавад
НАВГОНӢ ДАР СОЛИ НАВИ ТАҲСИЛ. Дар Тоҷикистон ба дониш ва малакаи хонандагон дар сатҳи 10 хол баҳо гузошта мешавад
Форуми дуюми Донишкадаи ҷумҳуриявии такмили ихтисос баргузор шуд
ОМОДАГӢ БА СОЛИ НАВИ ТАҲСИЛ. Хонандагони синфи якуми шаҳри Бӯстон ба ҷараёни таълим шинос карда мешаванд
Дар Душанбе оид ба рақамикунонӣ ва зеҳни сунъӣ ҳамоиш доир гардид
Тавассути Маркази барномаҳои байналмилалӣ беш аз 117 ҳазор шаҳрванди Тоҷикистон дар хориҷа таҳсил намудааст
ОМОДАГӢ БА СОЛИ НАВИ ТАҲСИЛ. Дар шаҳри Ҳисор се мактаби нав ба истифода дода мешавад
Дар Душанбе оид ба тарбияи насли наврас ҳамоиш доир гардид
Ҳайати Вазорати маориф ва таҳсилоти олии Давлати Қатар ба Донишгоҳи байналмилалии забонҳои хориҷии Тоҷикистон ташриф оварданд
Ба соҳаи маорифи вилояти Хатлон Сертификат дар ҳаҷми беш аз даҳ миллион сомонӣ тақдим карда шуд
Даври шаҳрии Озмуни ҷумҳуриявии «Мураббии соли Тоҷикистон-2025» ҷамъбаст гардид
Таҳкими ҳамкории Донишгоҳи миллии Тоҷикистон бо Вазорати маориф ва илми Қатар баррасӣ карда шуд