ДАРАХТ БИНШОН! Дар ноҳияи Шуғнон боғи намунавӣ бунёд гардид

ДУШАНБЕ, 20.04.2025. /АМИТ «Ховар»/.  Дар ноҳияи Шуғнони Вилояти Мухтори Кӯҳистони Бадахшон боғи намунавӣ бунёд гардид, ки дар он  3 ҳазор бех дарахтони мевадиҳанда шинонида шудаанд. Дар ин хусус ба АМИТ «Ховар» аз Мақомоти иҷроияи ҳокимияти давлатии Вилояти Мухтори Кӯҳистони Бадахшон итилоъ доданд.

Ба тавсияи олимони соҳаи кишоварзӣ, дар Тоҷикистон маъракаи ниҳолшинонӣ аз охири моҳи ноябр оғоз гардида, вобаста ба иқлими минтақаҳо то фасли баҳор идома меёбад. Ҳар ниҳолу дарахти ороишию сояафкан, мевадиҳанда ва гулу буттагиҳое, ки дар минтақаҳои гуногуни мамлакат шинонида мешаванд, бояд ба шароити табиӣ, иқлим ва мавқеи ҷуғрофии ҳамон минтақа мутобиқ бошанд. Масалан, ниҳоли дарахтон ё гулу буттаҳое мавҷуд мебошанд, ки хушкию гармӣ –Офтобро дӯст медоранд ва баръакс, баъзе ниҳоли дарахтон дар иқлими нарму муътадил, намнокии зиёд ва сардӣ хуб нашъунамо менамоянд.

Дар ҷараёни маъракаи ниҳолшинонӣ иброз шуд, ки барои нашъунамои хуби ниҳоли дарахтон аз моддаҳои органикӣ, ки хеле самарабахшанд, бояд оқилона истифода намуд.

Гуфта шуд, ки дар ноҳияи Дарвоз меваҳои субтропикӣ, ба мисли анҷир, анор, дар Ванҷ –себ, нок ва дар Рӯшону Шуғнон зардолу, чормағз ва тут хеле хуб парвариш меёбанд. Инчунин ба иқлими минтақаи Бадахшон бештар ниҳоли дарахтони арча, санавбар ва сарвинози шарқӣ хос аст.

АКС: Мақомоти иҷрояи ҳокимияти давлатии Вилояти Мухтори Кӯҳистони Бадахшон