Вобаста ба масъалаҳои муқовимат ба терроризм ва экстремизм конференсияи ҷумҳуриявӣ баргузор гардид

ДУШАНБЕ, 12.04.2025. /АМИТ «Ховар»/. 11 апрел дар Маркази миллии қонунгузории назди Президенти Ҷумҳурии Тоҷикистон дар мавзуи «Масъалаҳои мубрами муқовимат ба экстремизм ва терроризм дар шароити ҷаҳонишавӣ: мушкилот ва дурнамо» конференсияи ҷумҳуриявии илмӣ-амалӣ баргузор гардид. Дар ин хусус ба АМИТ «Ховар» аз ин марказ хабар доданд.

Зимни конфронс иброз гардид, ки  экстремизм ва терроризм дар замони имрӯза аз ҷумлаи умдатарин мушкилоти ҷаҳонӣ маҳсуб шуда, таваҷҷуҳи на танҳо як давлат ва ё минтақаи алоҳида, балки тамоми ҷомеаи башариро тақозо дорад. Дар ин замина танҳо дар доираи ҳамкорию ҳамгироии доираи васеи давлатҳо ва созмонҳои минтақавию байналмилалӣ метавон натиҷаи мусбат ба даст овард.

Таъкид шуд, ки барои Ҷумҳурии Тоҷикистон ва ҷомеаи ҷаҳонӣ терроризм ва экстремизм масъалаи мубрами рӯз ба ҳисоб мераванд. Зеро ин зуҳурот, пеш аз ҳама, ба ҳуқуқу озодиҳои инсон, амнияту осоиштагии давлатҳои дунё зарар мерасонанд. Бинобар ин, дар замони муосир ба таҳдиди экстремизму терроризм ва коҳиш додани сатҳи содиршаваии он диққати махсус дода мешавад. Вобаста ба ин муқовимат ба экстремизм ва терроризм дар қонунгузории қариб тамоми давлатҳои дунё пешбинӣ гардидааст.

Инчунин иштирокчиёни конференсияи ҷумҳуриявии илмӣ-амалӣ дар мавзуъҳои «Мушкилоти ташаккули сиёсати давлатӣ дар муқовимат ба экстремизми динӣ-сиёсӣ ва чораҳои пешгирии он», «Нақши ҳокимияти судӣ дар самти муқовимат ба экстремизм ва терроризм», «Сабабу омилҳои умумииҷтимоии пайдоиши экстремизми динӣ-мазҳабӣ дар Ҷумҳурии Тоҷикистон ва мукаммалсозии қонунгузории зиддиэкстремистӣ оид ба пешгирии онҳо», «Баъзе масоили ҷавобгарии ҷиноятӣ барои терроризм тибқи қонунгузории Ҷумҳурии Тоҷикистон», «Омилҳои ҳамроҳшавии ҷавонон ба ташкилоти террористӣ-экстремистӣ ва роҳҳои пешгирии он», «Моҳият ва мақсадҳои ғаразноки ташкилоту равияҳои экстремистӣ-террористӣ», «Масъалаҳои терроризм ва экстремизм дар Паёми Президенти Ҷумҳурии Тоҷикистон», «Мубориза бо ифротгароии динӣ ва терроризм» ва «Пешгирии хатарҳои глобалӣ дар мисоли терроризм ва экстремизм дар партави сиёсати башардӯстонаи Пешвои миллат» ибрози назар намуданд.

Иштирокчиён вобаста ба масъалаҳои қонунгузорӣ, илмӣ ва амалии муқовимат ба экстремизм ва терроризм табодули афкор намуданд.

АКС: Маркази миллии қонунгузории назди Президенти Ҷумҳурии Тоҷикистон