Дар Осорхонаи миллӣ намоиши офаридаҳои наққош ва муҷассамасози маъруф Амонуллоҳ Ҳайдарзод ифтитоҳ ёфт

Июнь 10, 2025 17:10

ДУШАНБЕ, 10.06.2025 /АМИТ «Ховар»/. Беш аз 120 нигораҳои ҷолиб ва офаридаҳои нодири наққош ва муҷассамасози маъруфи афғонистонии муқими Амрико Амонуллоҳ Ҳайдарзод дар Осорхонаи миллии Тоҷикистон ба намоиш гузошта шуд, иттилоъ медиҳад хабарнигори АМИТ «Ховар».

Намоиши офаридаҳои наққоши чирадаст ва муҷассамасози маъруф бо ибтикори Осорхонаи миллии Тоҷикистон, Кумитаи иҷроияи Анҷумани тоҷикон ва форсизабонони ҷаҳон -«Пайванд» ва Китобхонаи устод Халилуллоҳ Халилӣ ташкил карда шуд.

Роҳбарияти Осорхонаи миллии Тоҷикистон, Вазорати фарҳанг, Анҷумани «Пайванд», атташеи фарҳангии Сафорати Ҷумҳурии Исломии Афғонистон дар Ҷумҳурии Тоҷикистон доир ба ҳаёту фаъолияти эҷодии наққош ва муҷассамасози машҳур Амонуллоҳ Ҳайдарзод сухан намуда, нақши ӯро дар рушд ва муаррифии санъати наққошӣ байни форсизабони ҷаҳон муҳим арзёбӣ намуданд.

Дар намоиш зиёда аз 120 нигораҳои ҷолиб ва офаридаҳои нодири ҳунарманд Амонуллоҳ Ҳайдарзод, ки бо истифода аз маводи гуногун ба мисли шиша , филлиз, пластик, коғаз чеҳраи шахсиятҳои маъруфи ҷаҳониро бо услуби хос ва диди фалсафии хеш тасвир намудааст, ба маърази тамошо гузошта шуданд.

Профессор Амонуллоҳ Ҳайдарзод, ки ба арзишҳои инсонгароӣ ва ваҳдати фарҳангии форсизабонони ҷаҳон арҷ мегузорад, бо муҳаббат ва эҳтироми самимӣ нисбат ба Ҷумҳурии Тоҷикистон чор медал бо тасвири Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ омода намуда, онро ба Осорхонаи миллӣ ҳамчун рамзи дустӣ эҳдо намуд.

Намоиш дар фазои тантанавӣ баргузор гардида, ҳамчун як пайванди муҳим байни Тоҷикистон ва намояндагони форсизабонони ҷаҳон аз ҷониби ҳунарманд Амонуллоҳ Ҳайдарзод арзёбӣ гардид.

Намоиши нигораҳои ҷолиб ва офаридаҳои нодири наққош ва муҷассамасози маъруф Амонуллоҳ Ҳайдарзод далели возеҳи он аст, ки Анҷумани «Пайванд» дар тӯли фаъолияташ муваффақона сиёсати илмию фарҳангии Президенти Ҷумҳурии Тоҷикистон муҳтарам Эмомалӣ Раҳмонро дар дохил ва хориҷи кишвар таблиғу ташвиқ намуда, барои таҳкими ваҳдати маънавӣ байни тоҷикон ва форсизабонони ҷаҳон саҳми назаррас мегузорад.

Зиндагиномаи наққшош ва муҷассамасозӣ маъруф хеле рангин ва ибратомӯз аст. Амонуллоҳ Ҳайдарзод 86 сол дошта, соли 1939 дар пойтахти Афғонистон -шаҳри Кобул таваллуд шуда, дастпарвари Академияи ҳунарҳои зебои Рим ва Коллеҷи медалсозии заробхонаи Рим мебошад. Инчунин ӯ Институти ҳунарҳои «Корро»-и Римро хатм намуда, дорои мадраки коршиноси аршад (магистр) аз Донишгоҳи Ню-Йорк аст. Инчунин Устод ва бунёдгузори Донишкадаи ҳунарҳои зебои Донишгоҳи Кобул ва бунёдгузори нахустин осорхонаи ҳунарҳои муосир дар Кобул мебошад.

Марзия САИДЗОДА,
АМИТ «Ховар»

АКС: Осорхонаи миллии Тоҷикистон

Июнь 10, 2025 17:10

Хабарҳои дигари ин бахш

Нишасти Платформаи шарикии байни Ҷумҳурии Тоҷикистон ва САҲА доир шуд
Даври сеюми Озмуни ҷумҳуриявии «Тараннуми Ватан» баргузор гардид
Забони тоҷикӣ садсолаҳост рафтори нек, гуфтори неку пиндори некро таблиғ менамояд, — бардошт аз конференсияи ҷумҳуриявӣ
Пагоҳ маросими ҷоизасупорӣ ба ғолибони Озмуни ҷумҳуриявии «Тоҷикистон – Ватани азизи ман» баргузор мегардад
«ПЕШВОИ МИЛЛАТ ВА МАСЪАЛАҲОИ РУШДИ ЗАБОНИ ДАВЛАТӢ». Таҳти ин унвон конференсияи ҷумҳуриявӣ доир шуд
Маликшо Неъматзода: «Имрӯзҳо бо забони тоҷикӣ зиёда аз 150 миллион нафар одамон дар як қатор кишварҳои олам муошират менамоянд»
Бахшида ба Рӯзи забони давлатӣ конференсияи илмию амалии ҷумҳуриявӣ баргузор мегардад
Ғолибони Озмуни ҷумҳуриявии «Донандаи беҳтарини асарҳои Пешвои миллат» қадрдонӣ гардиданд
126 ҳазор нусха китоби «Шоҳнома»-и Абулқосим Фирдавсӣ ба сокинони ноҳияи Рӯдакӣ тақдим мегардад
РӮЗИ БАЙНАЛМИЛАЛИИ МУСИҚӢ. Забони мусиқӣ оламшумул буда, ба тарҷумон ниёз надорад
ШОИРЕ, КИ ҶАҲОНРО БА ҲАМ ВАСЛ МЕКУНАД. Асарҳои Мавлоно имрӯз низ аз хонданитарин асарҳои дунёянд
30 СЕНТЯБР — РӮЗИ МАВЛОНО. Ҷалолуддини Балхӣ бо андешаю афкори созанда ҷаҳонро тасхир намудааст