Гармхонаҳои инноватсионии шаҳри Леваканд фаъолияти босамар доранд

ДУШАНБЕ, 13.06.2025. /АМИТ «Ховар»/. Гармхонаҳои инноватсионии Ҷамъияти дорои масъулияти маҳдуди «Витаминҳои Тоҷикистон» дар шаҳри Левакант   дар масоҳати 2,5 гектар бунёд ёфтаанд. Дар ин гармхонаҳо  помидору бодиринг ва дигар навъҳои сабзавот парвариш меёбанд, ки на танҳо ба бозорҳои вилоят, балки ба дигар шаҳру ноҳияҳои ҷумҳурӣ дастрас карда мешаванд.

Тавре ба АМИТ «Ховар» аз хадамоти матбуоти Раиси вилояти Хатлон иттилоъ доданд,  айни замон дар корхона 50 корманд ба кор ҷалб гардидаанд. Кормандони ин корхона на танҳо бо маоши хуб таъмин мешаванд, инчунин бо сабзавоти дар гармхонаҳо парваришёфта, ба таври ройгон таъмин мегарданд.

Дар шаҳри Левакант ҳамчунин хоҷагии  ниҳолпарварӣ ва гулпарварии «Абдукарим» фаъолият мекунад. Дар ҳудуди ин хоҷагӣ беш аз 15 то 20 ҳазор ниҳолҳои ороишӣ ва мевадиҳанда, инчунин тақрибан 40 ҳазор гул ва буттаҳои ороишӣ парвариш ва ба фурӯш бароварда мешаванд.

Инчунин дар  хоҷагии боғпарварии ба номи Абдураҳмони Ҷомии шаҳр,  дар 5,3 гектар замин боғи мевадиҳанда бунёд шудааст. Дар ин хоҷагӣ асосан навъҳои гуногуни себ, шафтолу, зардолу, олу ва биҳӣ парвариш меёбанд. Айни замон хоҷагӣ дорои 10 саҳмдор буда, маҳсулоти он ҳам барои бозори дохилӣ ва ҳам барои содирот ба хориҷи мамлакат нигаронида шудааст.

АКС: Хадамоти матбуоти Раиси вилояти Хатлон