Донишгоҳи давлатии Кӯлоб ҳаҷми кумакпулиҳоро барои ҳимояи рисолаҳои илмӣ зиёд менамояд

ДУШАНБЕ, 26.07.2025 /АМИТ «Ховар»/. Бо мақсади дастгирии олимону муҳаққиқон ва тақвияти фаъолияти илмӣ-таҳқиқотӣ раёсати Донишгоҳи давлатии Кӯлоб ба номи Абуабдуллоҳи Рӯдакӣ тасмим гирифтааст, ки шуруъ аз моҳи сентябри соли равон ҳаҷми кумакпулиҳоро барои ҳимояи рисолаҳои илмӣ зиёд намояд. Тибқи ин тасмим, барои ҳимояи рисолаи номзадӣ 7000 сомонӣ ва барои ҳимояи рисолаи докторӣ 20000 сомонӣ ҷудо карда мешавад. Дар ин хусус 25 июл зимни нишасти матбуотии  донишгоҳ хабар дода шуд.

Иттилоъ дода шуд, ки дар самти илм ва таҳқиқот 93,08% омӯзгорони донишгоҳ ба корҳои илмӣ машғул буда, дар давраи ҳисоботӣ 1 нафар рисолаи докторӣ ва 9 нафар рисолаи номзадӣ ҳимоя намуданд.

Дар соли таҳсили 2024-2024 Донишгоҳи давлатии Кӯлобро 2 ҳазору 465 нафар муваффақона хатм намуда, 68 нафар соҳиби дипломи аъло гардид. Сифати умумии таълим ба 36,9% расида, нисбат ба соли 2024  1,9% афзудааст.

АКС: Донишгоҳи давлатии Кӯлоб ба номи Абуабдуллоҳи Рӯдакӣ