НИШАСТИ МАТБУОТӢ. Донишкадаи давлатии фарҳанг ва санъати Тоҷикистон ихтисоси «Омӯзгорони томактабӣ» таъсис медиҳад

ДУШАНБЕ, 31.07.2025. /АМИТ «Ховар»/. Дар Донишкадаи давлатии фарҳанг ва санъати Тоҷикистон ба номи Мирзо Турсунзода вобаста ба талабот ва ниёзҳои ҷомеа ояндаи наздик  ихтисоси нав — «Омӯзгорони томактабӣ» таъсис дода мешавад. Дар ин хусус имрӯз зимни нишасти матбуотӣ ректори донишкада Маҳмуд Назарзода ба хабарнигорон иттилоъ дод.

«Ин тасмим бо мақсади иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон дар самти фарогирии бештари кӯдакон ба таълиму тарбияи томактабӣ ва  дастрасӣ ба таҳсили босифат гирифта шудааст», -иброз дошт Маҳмуд Назарзода.

Иттилоъ дода шуд, ки имсол довталабон ба донишкада аз рӯи 29 ихтисос дар бахшҳои рӯзона, фосилавӣ ва ғоибона қабул карда шуданд. «Аллакай нақшаи қабул ба донишгоҳ дар даври якуми имтиҳонҳои марказонидаи дохилшавӣ аз тариқи Маркази миллии тестии назди Президенти Ҷумҳурии Тоҷикистон 40 фоиз иҷро шуда, дар даврҳои минбаъда пурра иҷро мегардад», -иттилоъ дод ректори донишкада.

Зарангези ЛАТИФ,
Тоҳири САИД (АКС),
АМИТ «Ховар»