Ҳайати парлумонии Иттиҳоди Аврупо дар Осорхонаи миллии Тоҷикистон бо тамаддуни қадимии тоҷикон шинос шуд

ДУШАНБЕ, 17.09.2025 /АМИТ «Ховар»/. Ҳайати Кумитаи байнипарлумонии Иттиҳоди Аврупо таҳти роҳбарии хонум Ҷузеппина Принчи, ки бо мақсади иштирок дар ҷаласаи 12-уми Кумитаи ҳамкории байнипарлумонии Тоҷикистону Иттиҳоди Аврупо ба Ҷумҳурии Тоҷикистон омадааст, дар Осорхонаи миллӣ бо таъриху фарҳанги тоҷикон шинос шуд.

АМИТ «Ховар» бо истинод ба Осорхонаи миллии Тоҷикистон иттилоъ медиҳад, ки ҳайати Кумитаи байнипарлумонии Иттиҳоди Аврупо дар толорҳои намоишии «Асри санг», «Аҳди биринҷ», «Кулолгарӣ», «Ҳахоманишиҳо», «Сиккаҳо», «Кушониён», «Панҷакенти қадим», «Аҷинатеппа» ва толори «Туҳфаҳои Президенти Ҷумҳурии Тоҷикистон» бо таърихи пурғановати миллати тоҷик, фарҳанги бою рангин ва шоҳкориҳои нодир, ки аз ҷониби ниёгони тоҷикон офарида шуда, инъикосгари фарҳанги миллати тоҷик давоми таърих мебошанд, аз наздик шинос гардид.

Ҷузеппина Принчи ва ҳайати Парлумони Аврупо аз тамошои толорҳои намоишӣ изҳори хушҳолӣ намуда, таассуроти худро дар китоби «Меҳмонони фахрӣ»-и Осорхонаи миллӣ дарҷ намуданд.

АКС: Осорхонаи миллии Тоҷикистон