Татбиқи лоиҳаҳои давлатии сармоягузорӣ дар соҳаҳои иқтисодиёти Тоҷикистон бо Барномаи рушди СММ баррасӣ гардид

ДУШАНБЕ, 04.09.2025 /АМИТ «Ховар»/. Имрӯз зимни мулоқоти Вазири молияи Ҷумҳурии Тоҷикистон Файзиддин Қаҳҳорзода ва роҳбари навтаъйини Намояндагии доимии Барномаи рушди Созмони Милали Муттаҳид дар Ҷумҳурии Тоҷикистон Судипто Мукерҷи ҷонибҳо атрофи татбиқи лоиҳаҳои давлатии сармоягузорӣ дар соҳаҳои воқеии иқтисодиёт, аз ҷумла энергетика ва саноат мубодилаи афкор намуданд.
Тавре АМИТ «Ховар» бо истинод ба Вазорати молия хабар медиҳад, дар мулоқот инчунин рақамикунонии бахши молия ва рушди низоми пардохтҳои ғайринақдӣ баррасӣ гардид.
Ҳамсуҳбатон барои тавсеаи минбаъдаи ҳамкорӣ дар ҳама самтҳои мавриди таваҷҷуҳ изҳори ҳавасмандӣ намуданд.
АКС: Вазорати молияи Ҷумҳурии Тоҷикистон