Дар деҳаи Қаратоғ Боғи хотира бунёд гардид

ТУРСУНЗОДА, 18.04.2020 /АМИТ «Ховар»/. Ба пешвози 75-умин солгарди Ғалаба бар фашизм дар Муассисаи таҳсилоти миёнаи умумии №12 деҳаи Қаратоғи шаҳри Турсунзода  ба хотираи иштирокчиён ва шаҳидони Ҷанги Бузурги Ватанӣ Боғи хотира бунёд гардид.

Дар маъракаи ниҳолшинонӣ дар боғи мазкур муовини якуми раиси шаҳри Турсунзода Сайдамин Остоназода, муовини Сафири Фавқулода ва Мухтори Федератсияи Россия дар Тоҷикистон  Шамил Шамсутдинов, намояндагони Маркази илмию фарҳангии Федератсияи Россия дар Тоҷикистон,  афсарону сарбозони пойгоҳи ҳарбии 201 Россия, мустақар дар Ҷумҳурии Тоҷикистон ва  устодону шогирдони муассисаи таълимӣ ширкат варзиданд.

Муаррих ва таърихшинос Руҳулло Ҷӯрабоев изҳор дошт, ки баробари дигар ҷавонмардони Тоҷикистон аз деҳаи Қаратоғ  дар солҳои ҷанг 572 нафар ба майдони набард бар зидди фашизм баромада, 234 нафари онҳо зимни дифои Ватан ҷавонмардона шаҳид гардидаанд.

Ба ифтихори 75-умин солгарди Ғалаба бар фашизм дар МТМУ№12  лавҳаи иштирокчиёни ҷанг низ омода гардида, номи ҳар як иштирокчӣ дар рӯи санг наққошӣ  шудааст.