Таваҷҷуҳи доираҳои соҳибкории Қазоқистон ба рушди иқтисоди Тоҷикистон беш аз пеш меафзояд

Душанбе, 20.10.2016. /АМИТ «Ховар»/. Таваҷҷуҳи доираҳои соҳибкории Қазоқистон ба рушди иқтисоди Тоҷикистон беш аз пеш афзудааст. Вобаста ба ин имрӯз дар меҳмонхонаи «Hyatt regency Dushanbe» Ҳамоиши доираҳои соҳибкории Тоҷикистону Қазоқистон оғоз ёфт, ки муддати се рӯз идома меёбад.
Дар расми ифтитоҳи чорабинӣ Шариф Саид -раиси Палатаи савдо ва саноати Тоҷикистон зикр кард, ки   «баргузории Ҳамоиши доираҳои соҳибкории Тоҷикистону Қазоқистон дар Душанбе дар тавсеаи равобити иқтисодию тиҷоратии ду кишвар нақши муассир мегузорад».
Дар  ҳамоиш ҳудуди 30 ширкати Қазоқистон намунаи молу маҳсулоти худро, ки аз маҳсулоти хӯрокворӣ ва саноати сабук, доруворӣ, кимиёвӣ ва сохтмонӣ   иборат аст,  ба намоиш гузоштаанд.
Ба иттилои масъулин, гардиши мол байни ду кишвар дар соли гузашта  580,4 млн. долларро ташкил дод, ки ин нишондод нисбат ба соли 2014 17,1% кам мебошад. Содирот аз Қазоқистон дар муқоиса ба соли 2014-ум 19,9 % коҳиш ёфта, 415,5 млн. долларро ташкил дод.