ВКД ҶТ: Барои азнавбақайдгирии симкортҳо шиносномаҳои намунаи соли 1996-ро то 10 август бо шиносномаҳои намунаи соли 2014 иваз намоед

ДУШАНБЕ, 27.05.2019 /АМИТ «Ховар»/. «Шахсоне, ки симкортҳои мобилиашон бо шиносномаҳои намунаи соли 1996 ба қайд гирифта шудаанд,  бояд то 10 августи соли равон  онҳоро   бо шиносномаи шаҳрвандии Ҷумҳурии Тоҷикистон намунаи соли 2014  аз нав ба қайд гиранд», — чунин  омадааст дар эълоне, ки дар сомонаи  Вазорати  корҳои дохили Ҷумҳурии Тоҷикистон   нашр   гардидааст.

ВКД ҳамчунин  аз шахсони мазкур  хоҳиш намудааст, ки  барои иваз намудани онҳо  ба шуъбаҳои шиносномадиҳии шуъбаҳои ВКД дар шаҳру ноҳияҳои ҷумҳурӣ муроҷиат намоянд.

Тавре аз Вазорати мазкур  ба мухбири АМИТ «Ховар» хабар доданд, ин иқдом бо мақсади иҷрои  Қарори Ҳукумати Ҷумҳурии Тоҷикистон аз 30 апрели соли 2016  «Дар бораи тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он» роҳандозӣ мегардад.

Ба иттилои манбаъ, тибқи дастури Вазири корҳои дохилии Ҷумҳурии Тоҷикистон ҳамаи шуъбачаҳои шиносномадиҳии ШВКД-ҳо дар шаҳру ноҳияҳои ҷумҳурӣ вазифадор шудаанд, ки реҷаи кории худро аз соати 08:00-и субҳ то соати 22:00-и шаб ба роҳ монанд.

Барои иваз намудани шиносномаи шаҳрванди Ҷумҳурии Тоҷикистон намунаи соли 1996 ба намунаи нави соли 2014 ҳуҷҷатҳои зерин лозим мебошанд:

1. Шиносномаи намунаи соли 1996.
2. Рақами мушаххаси андозсупоранда (ИНН).
3. Маълумот оид ба гурӯҳи хун (ихтиёрӣ).
4. Расид (квитансия) ба андозаи 10 доллари ШМА бо асъори миллӣ (иштирокчиёни ҶБВ ва шахсони ба онҳо баробар карда шуда, нафақахӯрон, маъюбони гурӯҳи 1 ва 2 аз пардохти маблағи шиноснома озоданд).
5. Дафтари ҳавлӣ ё ордери хона (манзилнома) ё маълумотнома аз ҷамоати деҳот.
6. Шаҳодатномаи ақди никоҳ (ё бекор кардани ақди никоҳ).
7. Як дона сурати сиёҳ-сафеди 3,5 х4,5 мм.