Муовини якуми Сарвазири Тоҷикистон дар Форуми ҳафтуми ҳамкории Чин-Осиёи Марказӣ иштирок намуд
ДУШАНБЕ, 19.10.2019 /АМИТ «Ховар»/. 18 октябр муовини якуми Сарвазири Ҷумҳурии Тоҷикистон Давлаталӣ Саид дар шаҳри Наннини Ноҳияи мухтори Гуансӣ-Ҷуани Ҷумҳурии Мардумии Чин бо роҳбарии ҳайати мамлакат дар Форуми ҳафтуми ҳамкории Чин-Осиёи Марказӣ иштирок намуд. Дар ин бора АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Мардумии Чин хабар медиҳад.
Зимни суханронӣ Давлаталӣ Саид зикр намуд, ки кишварҳои Осиёи Марказӣ ва Чин на танҳо бо сарҳади муштарак, балки бо анъанаҳои қадими фарҳангӣ ва тиҷоратӣ, ки аз давраи Роҳи абрешими бузург сарчашма мегиранд, бо ҳам пайванданд. Ҳамчунин зарурати бо талошҳои муштарак такмил додан ва таъсис додани абзори нави ҳамкорӣ, татбиқ намудани лоиҳаҳои бузургӣ стратегӣ ва рушди ҳамкорӣ дар соҳаҳои навоварӣ таъкид гардид.
Дар баробари иштироккунандагони анъанавии Форум дар ҷаласаи даври навбатии он ҳамчунин Котиби генералии Созмони ҳамкории Шанхай, намояндагони ҳукумат ва дигар доираҳои Арманистон, Озарбойҷон, Гурҷистон ва кишварҳои АСЕАН иштирок намуданд.
Дар ҳошияи Форум зерфорумҳо оид ба масъалаҳои ҳамкорӣ дар соҳаи логистикаи фаромарзӣ ва тиҷорати электронӣ, рушди муштараки шаҳрҳои ҳушманд ва ҳамкорӣ оид ба татбиқи низоми навигатсияи моҳворавӣ доир гардиданд.
Дар доираи Форуми номбурда ҳамчунин Форуми занони Чин-Осиёи Марказӣ доир карда шуд, ки дар он иштироккунандагон оид ба масъалаҳои таъмиқи табодул ва муттаҳидкунии саҳми занон баҳри рушд ва пешрафти давлатҳои минтақа, аз ҷумла дар доираи “Камарбанд ва роҳ” изҳори назар намуданд.
Аъзои ҳайати Тоҷикистон дар зерфорумҳо фаъолона иштирок ва суханронӣ намуда, ба иштирокунандагони онҳо дар бораи сиёсат ва муносибати Тоҷикистон нисбат ба масъалаҳои муҳокимашаванда сухан гуфтанд.
Дар доираи Форуми ҳамкории Чин-Осиёи Марказӣ ҳамчунин Намоишгоҳи кишварҳои иштироккунандаи Форум ташкил карда шуд. Дар он беҳтарин намунаҳои маснуоти ҳунарҳои мардумии Тоҷикистон, аксҳо ва маводи иттилоотӣ ба намоиш гузошта шуданд, ки дар онҳо таърих, фарҳанг, санъати мардуми тоҷик ва забони тоҷикӣ, боигариҳои табиӣ, мавзеъҳои диққатҷалбкунанда, имкониятҳои сайёҳӣ ва соҳаҳои фаъолияти мамлакат инъикос ёфтанд.
АКС: Сафорати Ҷумҳурии Тоҷикистон дар Ҷумҳурии Мардумии Чин
Дар Душанбе бақайдгирии намояндагони ВАО барои иштирок дар Конфронси минтақавии Созмони озуқаворӣ ва кишоварзии СММ оғоз шуд
Фаррух Шарифзода дар Форуми дипломатии Анталия иштирок намуд
Ҷумҳурии Тоҷикистон раиси иҷлосияи 60-уми Комиссияи СММ оид ба аҳолӣ ва рушд интихоб шуд
Сафири Тоҷикистон бо муовини вазири корҳои хориҷии Миср мулоқот намуд
Дар Москва вохӯрии нуҳуми вазирони корҳои хориҷӣ дар қолаби «Осиёи Марказӣ – Русия» баргузор гардид
Дар Душанбе масъалаҳои мубрами ҳамкорӣ байни Тоҷикистон ва ЮНИСЕФ баррасӣ гардид
Сироҷиддин Муҳриддин дар ҷаласаи Шурои Вазири корҳои хориҷии ИДМ иштирок намуд
Дар Миср маҷаллаи «Тоҷикистон ва пиряхҳо» ба забони арабӣ ва англисӣ ба нашр расид
Азамшо Шарифӣ: «Дипломатияи «сабз» дар сиёсати хориҷии Тоҷикистон ҷойгоҳи хосса дорад»
Дар Женева таҳти унвони «Нақши Устувонаи Куруши Кабир дар ташаккули ҳуқуқу озодиҳои муосири инсон» ҳамоиш доир шуд
РАВАНДИ ОБИ ДУШАНБЕ. Дар Сеул нишасти матбуотӣ оид ба Конфронси чоруми байналмилалии сатҳи баланд доир шуд
Намояндагони Сафорати Тоҷикистон дар Донишгоҳи давлатии ҳуқуқшиносии Москва бо донишҷӯёни тоҷик мулоқот намуданд
