Сафари гурӯҳи корӣ таҳти раҳбарии муовини Сарвазири Тоҷикистон Азим Иброҳим дар Бадахшон анҷом ёфт

Август 6, 2020 13:42

ХОРУҒ, 06.08.2020. /АМИТ «Ховар»/. Муовини Сарвазири Ҷумҳурии Тоҷикистон Азим Иброҳим дар идомаи сафари корӣ  дар шаҳри Хоруғи Вилояти Мухтори Кӯҳистони Бадахшон бо ҷараёни корҳои сохтмонӣ дар  иншооти ҷашнӣ шинос шуда, бо масъулини биноҳои бунёдшаванда ва бинокорон мулоқот намуд.

Нахустин иншооте, ки гурӯҳи корӣ аз он дидан намуд, ин хати нави  ташноб дар маҳаллаи Хоруғи боло мебошад. Ин хати навбунёди ташноб дар масофаи 574 метр  бунёд гардида,  корҳои сохтмониро ширкати маҳаллии сохтмонии «Мадад» ба зимма дорад. Ояндаи наздик аз он  биноҳои  навбунёди ин маҳал, бо шумули Раёсати маориф, Коллеҷи тиббӣ ва Муассисаи  таҳсилоти миёнаи умумии раками 8-и шаҳри Хоруғ  истифода мекунанд.

Муовини Сарвазири Ҷумҳурии Тоҷикистон ҳамчунин бо ҷараёни  корҳои сохтмонӣ дар бинои муассисаи   таълимии рақами ҳаштуми ин маҳалла шинос шуда, аз бинокорон даъват намуд, ки ба сифати корашон аҳамияти бештар  диҳанд. Зеро дар ин бино фарзандону наберагони онҳо таҳсил хоҳанд кард ва бинои зебову хушсифат низ метавонад ба дониш, маҳорат ва эҳсоси зебоипарастии онҳо таъсири мусбат расонад.

Муовини Сарвазири ҷумҳурӣ аз истифодаи сангҳои маҳаллӣ  дар сохтмони таълимгоҳи навбунёд ситоиш карда,  изҳор дошт, ки ин  падидаи хеле ҷолиб аст ва минбаъд низ аз он дар биноҳои дигар ба шаклҳои гуногун истифода бурдан ба манфиати кор аст.

Бинои муассисаи таҳсилоти миёнаи умумии рақами ҳаштуми шаҳр аз ҷониби Ҳукумати Ҷумҳурии Тоҷикистон бо арзиши харҷномавии 26 миллион сомонӣ бунёд ёфта, айни ҳол корҳои ороишӣ ва гулпӯшу сарсабз намудани  атрофи он  идома дорад. Рафти корҳои сохтмонӣ дар ин сохтмон дар асоси  нақшаи муосири  тарҳрезишуда  идома дошта, бинокорон ҳоло дар озмоишгоҳҳои синфхонаҳои  фанҳои химияву биология ва физика ба гузаронидани хатҳои оби гарму сард ва насбу васли таҷҳизоти технологӣ машғуланд. Ин   иншоот барои 640 нафар хонанда бо тамоми шароити муосири таълими пешбинӣ гардида, он  аз се ошёна ва се  бинои асосии таълимӣ  иборат мебошад. Корҳои сохтмонӣ дар ин иншоот  аз моҳи июни соли 2019 оғоз гардиданд. Дар  марҳилаи якум мутобиқи  лоиҳаи Дирексияи сохтмони иншооти ҳукуматии Дастгоҳи иҷроияи Президенти  Ҷумҳурии Тоҷикистон  3 миллион сомонӣ  ҷудо гардидааст. Бинокорон  бо масолеҳи сохтмонӣ  пурра таъмин буда, аллакай  ҳаҷми  муайяни корҳои бунёдӣ  анҷом дода шудааст.

Давоми ду соли охир бо дастуру супоришҳои роҳбарияти олии мамлакат дар маркази вилоят- шаҳри Хоруғ аз ҷониби Федератсияи футболи Тоҷикистон се майдончаи муосири варзишӣ мавриди баҳрабардорӣ қарор дода шуданд. Соли равон тасмим гирифта шуд, ки боз ду майдончаи дигар низ  бо дастгирии Федератсияи футболи Тоҷикистон дар шаҳри Хоруғ  бунёд шавад.

Ҳоло ба истиқболи солгарди навбатии Истиқлолияти давлатии ҷумҳурӣ бо дастгирии Ҳукумати Ҷумҳурии Тоҷикистон дар маҳаллаҳои шаҳри Хоруг  сохтмони 9 майдончаи варзишӣ  идома дорад, ки бунёди се адади ин майдончаҳо бо маблағгузории Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон ва шаш майдончаи дигар дар асоси лоиҳаи “Мусоидат ба сулҳу субот” тавассути шарикони рушд  дар назар дошта шудааст. Гурӯҳи корӣ бо ҷараёни корҳои бунёдӣ дар майдончаи варзишии маҳаллаи Тирчиди ҷамоати шаҳраки Исмоили Сомонӣ ва маҳаллаи Андарситези шаҳри Хоруғ  шинос шуда, барои  ҷалби ҳарчи бештари ҷавонон ба варзиш ва тарғиби тарзи ҳаёти солим бунёд намудани чунин майдончаҳои варзиширо ба манфиати кор арзёбӣ намуд.

Пас аз мулоқот бо масъулини мақомоти иҷроияи ҳокимияти давлатии шаҳру вилоят гурӯҳи корӣ таҳти сарварии муовини Сарвазири Ҷумҳурии Тоҷикистон Азим Иброҳим  ба пойтахти мамлакат- шаҳри Душанбе баргашт.

Август 6, 2020 13:42

Хабарҳои дигари ин бахш

Фармони Президенти Ҷумҳурии Тоҷикистон дар бораи ҷашн гирифтани 35-солагии Истиқлоли давлатии Ҷумҳурии Тоҷикистон
Дар Ванҷ ба муносибати ҷашни 30-солагии Истиқлолияти давлатӣ 84 иншоот бунёд гардид
ДАР СЕ ДАҚИҚА ДАР БОРАИ СӢ СОЛ. Телевизиони марказии Чин навореро дар бораи ҳамкории Чин ва Тоҷикистон намоиш дод
РОҲИ ДУШАНБЕ-ЧАНОК КУШОДА ШУД. Роҳ пас аз фаромадани 17 тарма тоза карда шуда, ҳаракати нақлиёт дар ду самт оғоз гардид
ШУМОРАИ НАВБАТИИ БЮЛЛЕТЕН «ОИД БА ТАДБИРҲОИ МУБОРИЗА БО КОРОНАВИРУС ДАР КИШВАРҲОИ ИДМ» НАШР ШУД. Бахши вобаста ба Тоҷикистон аз маводи нашркардаи АМИТ «Ховар» иборат аст
АҚЛИ РАСО ВА ДИДАИ БИНО. Омилҳое, ки барои дарки мазмуну моҳияти Паёми Пешвои миллат ба мақоми олии намояндагӣ ва қонунгузории мамлакат заруранд
СОЛИ 2022 МОРО ЧӢ ИНТИЗОР АСТ? Гузориши хабарнигорони АМИТ «Ховар» дар бораи дигаргуниҳо дар ҳаёти мардуми Тоҷикистон
Соҳибкор Маҳмудҷон Муродов дар арафаи Соли нави мелодӣ ба сарбозону афсарон ва оилаҳои ниёзманд кумаки моддӣ расонид
ДАР ТОҶИКИСТОН СУРЪАТИ ЭМГУЗАРОНӢ АЗ КОВИД-19-РО АФЗОИШ МЕДИҲАНД. Вале иҷрои нақша дар баъзе шаҳру ноҳияҳои мамлакат дар сатҳи паст қарор дорад
Рустам Ҳайдаров: Паёми Президенти Тоҷикистон дар шароити мураккаби геополитикӣ ва геоиқтисодии ҷаҳони имрӯза ҳуҷҷати роҳнамост
Соҳибкорони Хатлон 1617 адад иншоот сохта мавриди истифода қарор доданд
Зубайдулло Давлатов, коршиноси масоили сиёсӣ: Паёми навбатии Пешвои миллат фарогири як пешниҳод, як нақшаи чорабиниҳо, як барнома, ду стратегия, ду консепсия ва даҳ супориш аст