«Зебоӣ, доноӣ ва тавоноӣ аз варзиш аст!» Дар Душанбе Фестивали дӯстии ҷавонону варзишгарон оғоз гардид

Август 27, 2020 17:01

ДУШАНБЕ, 27.08.2020 /АМИТ «Ховар»/. Имрӯз ба шарафи 29-солагии Истиқлолияти давлатии Ҷумҳурии Тоҷикистон дар «Кохи афсарон»- и  шаҳри Душанбе  маросими ифтитоҳи Фестивали дӯстии ҷавонону варзишгарони пойтахт таҳти унвони «Зебоӣ, доноӣ ва тавоноӣ аз варзиш аст!»  оғоз  гардид. Фестивал аз 27 август то 15 сентбр дар заминаи тамоми муассисаҳои таҳсилоти миёнаи умумӣ, олии касбӣ, миёнаи касбӣ, ибтидоии касбӣ, қисмҳои ҳарбию низомӣ ва маҳаллаҳои ҳудуди шаҳри Душанбе баргузор карда мешавад. 

Фестивали мазкур бо дастуру супоришҳои Раиси шаҳри Душанбе Рустами Эмомалӣ доир гардида, дар он муовини Раиси шаҳри Душанбе Мавсума Муинӣ, сардори Раёсати шаҳри Душанбе Шаҳзод Раҳимзода, намояндагони кумитаҳои кор бо ҷавонон, роҳбарони муассисаҳои варзишӣ, устодону донишҷӯён ва варзишгарони маъруфи мамлакат аз ҳисоби  донишгоҳу донишкадаҳо, коллеҷу омӯзишгоҳҳо, муассисаҳои варзишии шаҳриву ҷумҳуриявӣ ва муассисаҳои таҳсилоти миёнаи умумии ҳудуди пойтахт иштирок намуданд.

Дар саҳни «Кохи афсарон» тамоми дастовардҳои соҳаи варзиш ба намоиш гузошта шуданд.

Муовини раиси шаҳри Душанбе Мавсума Муинӣ фестивалро ифтитоҳ намуда, зикр дошт, ки яке аз самтҳои афзалиятноки сиёсати иҷтимоии Ҳукумати мамлакат маҳз соҳаи тарбияи ҷисмонӣ ва варзиш маҳсуб шуда, он ба хотири таъмини оммавияти варзиш ва таҳкими тарзи ҳаёти солим равона гардидааст.

«Дар масири таърих варзиш рукни муҳими ҳаёти ҳаррӯзаи ҳар як фард арзёбӣ гардида, он дар баробари тақвият бахшидан ба қувваи ҷисмонӣ барои наврасону ҷавонон ҳамчун майдони мукаммалгардонии неруи зеҳнӣ ва хислатҳои наҷиби инсонӣ хизмат менамояд. Яке  аз самтҳои афзалиятноки сиёсати иҷтимоии Ҳукумати мамлакат маҳз соҳаи тарбияи ҷисмонӣ ва варзиш маҳсуб мешавад. Он  ба хотири таъмини оммавияти варзиш, таҳкими тарзи ҳаёти солим, мусоидат намудан ба омодакунии варзишгарони касбии тоҷик барои иштирок дар мусобиқаҳои бонуфузи байналмилалӣ нигаронида шудааст»,- иброз дошт Масвума Муинӣ.

Ҳадаф аз ташкил ва баргузор намудани Фестивали дӯсти ҷавонону варзишгарони шаҳри Душанбе самаранок истифода намудани иншооти соҳаи варзиш, махсусан майдончаҳои варзишӣ ва бозии кӯдакона, пешбурди корҳои фаҳмондадиҳӣ бо сокинон ва наврасону ҷавонон ҷиҳати тозаю озода ва дар ҳолати коршоямӣ нигоҳ доштани майдончаҳои мазкур, ташкили мусобиқаҳои дӯстонаи варзишӣ байни ҷавонони маҳал, хонандагону донишҷӯён ва афсарону сарбозон мебошад. Он инчунин ҷиҳати таҳкими ҳаёти солим, ҷалби ҷавонон ба варзиш, пешгирии бемории сироятӣ, хосатан пешгирии ҷавонону наврасон аз амалҳои номатлуби иҷтимоӣ ва тарбия намудани онҳо дар рӯҳияи ватандӯстию хештаншиносӣ, ҳушёриву зиракӣ, фарогирии масъалаҳои ҳаётӣ ва тарбияи инсонию ҷисмонӣ мебошад.

Ёдовар мешавем, ки Фестивали дӯстии ҷавонону варзишгарони пойтахт 2 марҳиларо дар бар  гирифта, миёни донишҷӯёни муассисаҳои таҳсилоти олӣ, миёнаи касбӣ, омӯзишгоҳҳои касбӣ-техникӣ ва муассисаҳои таҳсилоти миёнаи умумии ҳудуди шаҳри Душанбе баргузор мегардад.

Марҳилаи якум дар доираи муассисаҳои таълимӣ  доир  шуда, дар марҳилаи дуюм ғолибони даври аввал метавонанд иштирок намоянд.

Фестивали дӯстии ҷавонону варзишгарони пойтахт аз рӯи 4 намуди варзиш:  футболи хурд, волейбол миёни духтарон, шоҳмот ва гӯштини миллӣ баргузор шуда, то 13 сентябр идома меёбад.

Маросими ҷамъбасти Фестивал 15 сентябр дар толори Филармонияи давлатии Ҷумҳурии Тоҷикистон бо сарпарастии Мақомоти иҷроияи ҳокимияти давлатии шаҳри Душанбе ва Федератсияи футболи Тоҷикистон доир шуда, ғолибон аз ҷониби Раёсати кор бо ҷавонон ва варзиши шаҳри Душанбе бо Диплом, медал ва ҷом сарфароз гардонида мешаванд.

Август 27, 2020 17:01

Хабарҳои дигари ин бахш

«Омад хуҷаста Меҳргон, ҷашни бузурги хусравон…». Пагоҳ дар шаҳри Душанбе Иди Меҳргон таҷлил мегардад
Дар Душанбе боз 100 адад троллейбусҳои муосири истеҳсоли ширкати «Белкоммунмаш» ба мусофирон хизмат мерасонанд
Дар Душанбе мавсими интиқоли гармӣ оғоз шуд
Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе Рустами Эмомалӣ ба номзади арзанда овоз доданд
Ярмарка-фурӯшгоҳҳои Душанбе фаъолтар мегарданд
Дар Душанбе автобуси дуқабата ба хизматрасонии мусофирон оғоз намуданд
«САРҲАДИ ТОҶИК ЗАБОНИ ТОҶИК АСТ…». Мулоҳизаҳои узви Комиссия оид ба татбиқи Қонуни забони давлатӣ дар шаҳри Душанбе
АЗ ШАҲДИ АНГУР ТО ГУЛИ АСАЛ. Имрӯз дар Бозори «Меҳргон»-и Душанбе Фестивал-намоиши фурӯши асал, озмуни ангур ва дигар анвои меваҷот доир гардид
Дар Душанбе таҳти унвони «Ҷонибдории Эмомалӣ Раҳмон дар интихобот – кафили саодати мардум ва рушди босуботи мамлакат» ҳамоиш доир шуд
Пагоҳ дар Бозори «Меҳргон»-и Душанбе Фестивал-намоиши фурӯши асал, озмуни ангур ва дигар анвои меваҷот доир мегардад
Дар Душанбе Рӯзи даъватшаванда доир гардид
Иқдоми «шаҳри сабз»-и Рустами Эмомалӣ Душанбеи гулпӯшро боз ҳам хуррамтар мегардонад