НИЁИШ. Доктор Ҳумайро Накҳат Дастгирзода аз олам даргузашт

Сентябрь 5, 2020 08:51

ДУШАНБЕ, 05.09.2020/АМИТ «Ховар»/.  Доктор Ҳумайро Накҳат Дастгирзода, шоир ва адабиётшиноси маъруфи Афғонистон, ки дар ҳиҷрат буд ва чанд соли охир аз бемории саратон ранҷ мебурд, ҷаҳонро падруд гуфт. Дар ин бора Шоири халқии Тоҷикистон, сардабири маҷаллаи «Садои Шарқ» Рустами Ваҳҳоб дирӯз, 4-уми сентябр, дар саҳифаи худ дар шабакаи иҷтимоии Facebook хабар додааст.

Рустами Ваҳҳоб дар идома чунин нигоштааст: «Мавсуф дар Ҳамоиши ҷаҳонии шеъри ҳавзаи тамаддуни Наврӯз дар соли 2016 дар Душанбе ширкат дошт ва ба минтақаҳои гуногуни Тоҷикистон дар чаҳорчӯби барномаи ин ҳамоиш сафар карда, ашъори дилнишини худро барои мардум қироат намуд. Аз ин сафар ибрози шодмонӣ ва масаррати зиёд дошт. Ҳамеша бо идораи маҷалла ҳамкорӣ мекард ва хусусан ҳар сол барои вижаномаи наврӯзии маҷалла ашъори тозаи худро мефиристод».

Рустами Ваҳҳоб дар фарҷом бо овардани  як ғазали наврӯзии шодравон аз вижаномаи наврӯзии соли 2019-и  «Садои Шарқ» навиштааст: «Ёду хотири ӯро гиромӣ медорем ва барои пайвандону мухлисони ашъораш арзи тасалло менамоем».

 

 

НИЁИШ

Наврӯз, боғи хастаи моро баҳор деҳ,
Дар дастҳои яхзадааш обшор деҳ.

Дар лаҳзаҳои тирагии яъсҳои талх
Овезаҳои нур биёвезу нор деҳ.

Наврӯз, он нигоҳи ғамини парандаро
То интиҳои лаззати парвоз тор деҳ.

Дасти тамоми панҷараҳои шикастаро
Дар дасти боғи равшани уммедвор деҳ.

Наврӯз, ман хаёли туам, пур зи ошиқӣ,
Ишқам, маро ба боли насиму ғубор деҳ.

Бигзор бигзарад зи хами кӯча офтоб,
Ин чашмро чу оинаҳо эътибор деҳ.

Андӯҳи рӯзгори ба хушкӣ нишастаро
Аз синаҳо бичину ба боди шарор деҳ.

Инак, тулӯъи тоза, биёрой боргоҳ,
Наврӯз, сарзамини маро хону бор деҳ.

Сентябрь 5, 2020 08:51

Хабарҳои дигари ин бахш

«ДАСТХАТҲОИ ҚАЛЪАИ МУҒ». Нодиртарин ёдгориҳои Тоҷикистон ба рӯйхати «Ҳофизаи ҷаҳонӣ»-и созмони ЮНЕСКО дохил гардиданд
Дар Тоҷикистон ҳунари балети Узбекистон муаррифӣ карда мешавад
Дар Ҷумҳурии Мардумии Чин Рӯзҳои фарҳанги Ҷумҳурии Тоҷикистон идома дорад
Дар шаҳри Панҷакент Боғи фарҳангию фароғатии ба номи Абулқосим Фирдавсӣ бунёд карда мешавад
«УМРЕ БО МУСИҚӢ». Дар Душанбе ҳамоиши илмӣ баргузор гардид
Ба гиромидошти асосгузори мактаби классикии шеър-мусиқии замони Сомониён Абулаббоси Бахтиёр симпозиуми байналмилалӣ доир шуд
Дар Ҳисор маҳфил-озмуни «Шоҳнома Ватан аст!» оғоз гардид
Директори Хадамоти федералии приставҳои судии Федератсияи Русия бо таъриху тамаддуни тоҷикон шинос шуд
Дар Китобхонаи миллӣ даври аввали озмуни «Фурӯғи субҳи доноӣ китоб аст» баргузор гардид
Дастхатҳои Қалъаи Кӯҳи Муғ ба рӯйхати «Ҳофизаи ҷаҳонӣ»-и ЮНЕСКО дохил шуданд
СОЛИ ФАРҲАНГИ КИТОБХОНӢ. Дар доираи он дар вилояти Хатлон конференсияи илмӣ-амалӣ баргузор шуд
Байни Академияи миллии илмҳои Тоҷикистон, Бойгонии апостолии Ватикан ва Китобхонаи апостолии Ватикан Ёддошти тафоҳум ба имзо расид