Дар Душанбе истеҳсоли доруҳо аз растаниҳои табиӣ, таъсиси корхонаҳои муштараки Тоҷикистон ва Эрон баррасӣ шуд

ДУШАНБЕ, 24.02.2021 /АМИТ «Ховар»/. Имконоти тавсеаи ҳамкорӣ дар соҳаи коркарди пӯст ва пашм, истеҳсоли муштараки маҳсулоти доруворӣ аз растаниҳои табиӣ, ташкили корхонаҳои муштарак оид ба коркард ва бастабандии маҳсулоти кишоварзиро раиси вилояти Хатлон Қурбон Ҳакимзода ва раиси вилояти Хуросон-Разавии Эрон Муҳаммадсодиқ Мутамадиён 23 феврал баррасӣ намуданд.

Бино ба маълумоти шуъбаи иттилоотӣ-таҳлилии Мақомоти иҷроияи ҳокимияти давлатии вилояти Хатлон, раиси вилояти Хатлон Қурбон Ҳакимзода зимни суҳбат имконоти иқтисодӣ ва сармоягузории минтақаро муаррифӣ кард.

«Соли 2020 ҳаҷми истеҳсоли маҳсулоти саноатӣ дар вилоят ба 8,8 миллиард сомонӣ расид, 619 корхона ва коргоҳ аз ҳисоби соҳибкорони ватанӣ сохта шуданд. Соли гузашта вилоят 110 ҳазор тонна маҳсулоти кишоварзӣ содир кардааст», — иброз кард ӯ.

Тарафҳо алоқамандии худро ба таҳкими минбаъда ва тавсеаи муносибатҳои судманди дуҷониба дар соҳаҳои гуногуни мавриди таваҷҷуҳ, ба шумули соҳаҳои кишоварзӣ, иқтисодӣ, фарҳангӣ, илмӣ ва сайёҳӣ иброз доштанд.

Ёдовар мешавем, ки моҳи декабри соли 2019 раиси собиқи вилояти Хуросон-Разавии Эрон Алиризо Размҳусейнӣ ба вилояти Хатлон ташриф оварда буд.

МАЪЛУМОТИ МО:

Хуросон-Разавӣ яке аз остонҳо (вилоятҳо) -и Ҷумҳурии Исломии Эрон аст, ки дар қисмати шимолу шарқии кишвар ҷойгир аст. Маркази маъмурии он шаҳри Машҳад, дуввумин шаҳри калонтарин ва сераҳолии Эрон мебошад.

ДАР АКС: ҷамъоварии ҳосили заъфарон дар вилояти Хуросон-Разавӣ. Ҳар сол кишвар зиёда аз 200 тонна заъфарон ба 50 кишвари ҷаҳон — ИМА, Германия, Британияи Кабир, Италия, Испания, Белгия, Шветсия, Швейтсария, Франсия, Канада ва Ҳолланд, Ҳонгконг ва Афғонистон содир мекунад. Заъфарон доруворест, ки бӯи қавӣ ва ранги хос дорад, аз антиоксидантҳо ғанӣ буда, ба саломатӣ метавонанд фоидаи калон дошта бошанд. Далелҳои охир нишон медиҳанд, ки заъфарон метавонад ҳолати рӯҳиро беҳтар созад ва бо оксидкунандаи такони рӯҳӣ (стресс) мубориза барад.

Остони Хуросон-Разавӣ дар қисмати шимолу шарқии Эрон ҷойгир аст. Аз шимол ва шимолу шарқ бо Туркманистон, аз тарафи шимолу ғарб бо остони Хуросони Шимолӣ, аз ғарб бо остони Семнон, дар ҷануб бо остони Хуросони Ҷанубӣ ва аз тарафи шарқ бо Афғонистон ҳаммарз аст. Масоҳати остони Хуросон-Резавӣ 118,884 км² мебошад ва аз рӯи ин нишондиҳанда дар байни 31 остони Эрон дар ҷои 6-ум қарор дорад.

Остони Хуросон-Разавӣ ба 28 шаҳристон (ноҳия) тақсим шудааст.