«МАҚСАДҲОИ ГЛОБАЛӢ БАРОИ ҲАМА». Дар Дубай форуми тиҷоратӣ ба кор оғоз намуд
![](https://khovar.tj/wp-content/uploads/2022/01/33.jpg)
ДУШАНБЕ, 20.01.2022. /АМИТ «Ховар»/. Дар доираи баргузории «ЭКСПО-2020 Дубай» дар шакли омехта (ҳузурӣ ва маҷозӣ) Форуми тиҷоратии «Мақсадҳои глобалӣ барои ҳама» ва Ҳафтаи ҳадафҳои глобалӣ ба кор оғоз намуд, хабар доданд дар Палатаи савдо ва саноати Ҷумҳурии Тоҷикистон ба АМИТ «Ховар».
Ҳадаф аз баргузории ин форум баланд бардоштани сатҳи огоҳӣ дар бораи Ҳадафҳои Рушди Устувор (SDGs) ва таъкид ба зарурати пурзӯр намудани уҳдадориҳо барои иҷрои ҳадафҳои даҳсолаи амал мебошад.
Иштироккунандагон зикр намуданд, ки танҳо тавассути шарикӣ дар сатҳи маҳаллӣ, минтақавӣ ва глобалӣ мо метавонем ба ин ҳадафҳои ҷаҳонӣ ноил шавем.
Дар кори форум намояндагони палатаҳои савдо ва саноат ва бахшҳои хусусии якчанд мамлакатҳо иштирок намуданд.
Бо дарназардошти он ки Палатаи савдо ва саноати Ҷумҳурии Тоҷикистон ба пешбурди Ҳадафҳои Рушди Устувор дар ҳама сатҳҳои бахшҳои давлатӣ, хусусӣ ва ғайритиҷоратӣ афзалият медиҳад, дар форум роҳбарияти Палатаи савдо ва саноати Ҷумҳурии Тоҷикистон, роҳбарияти палатаҳои минтақавии Суғд ва Хатлон ва намояндагони бахши хусусии Ҷумҳурии Тоҷикистон низ иштирок намуданд.
АКС аз ПСС Тоҷикистон