Сарвари давлат Эмомалӣ Раҳмон дар ноҳияи Данғара Боғи фарҳангию фароғатиро ифтитоҳ намуда, ба ятимон туҳфаҳо тақдим карданд

Апрель 28, 2022 08:45

ДУШАНБЕ, 28.04.2022 /АМИТ «Ховар»/. 28 апрел Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳраки Данғараи ноҳияи Данғара Боғи фарҳангию фароғатиро расман ифтитоҳ намуда, бо шароити он шинос шуданд.

Иншоот дар масоҳати умумии 0,60 гектарбунёд гардида, аз комплекси маҷмуавии истироҳатию варзишӣ ва биноҳои муосири савдою хизматрасонӣ иборат мебошад ва барои саёҳату истироҳати сокинон, машғулияти ҷавонону наврасон ба намудҳои гуногуни варзиш макони беҳтарини фароғат маҳсуб меёбад.

Боғи фарҳангию фароғатӣ ва гулгашти зебо бо дастгирӣ ва ҳидоятҳои созандаи Пешвои муаззами миллат муҳтарам Эмомалӣ Раҳмон ҷиҳати сазовор истиқбол намудани ҷашни 35-солагии Истиқлоли давлатӣ ва дар ин замина таъмини шароити беҳтари истироҳат ба сокинон аз ҷониби соҳибкори ватанӣ Фариддуни Абдусалом бо санъати баланди меъморӣ сохта шудааст. Дар маҷмааи нав бинои тарабхонаи дуошёнаи замонавӣ барои гузаронидани маҳфилу чорабиниҳо бо 132 ҷойи нишаст, майдончаи варзишӣ барои футболи хурд ва бозӣ барои кӯдакон, 2 мағозаи фурӯши обҳои ташнагишикан, яхмос ва маҳсулоти тезтайёр ҷойгир мебошанд.

Дар майдончаи варзишӣ ва бозӣ барои кӯдакон, ки ҷавобгӯи талаботи замон бунёд шудааст, минбаъд ҷавонону наврасон имкон доранд ба бозиҳои футбол ва дигар намуди варзиши сабук машғул шаванд.

Бо мавриди истифода қарор гирифани боғи фарҳангию фароғатӣ ва бунёди якчанд иншоот дар он беш аз 20 нафар сокини маҳаллӣ бо ҷойи кори мувофиқ таъмин шуданд.

Сарвари давлат иқдоми соҳибкори ватаниро ҷиҳати бунёди чунин боғу гулгашти замонавӣ, ки бо муосиртарин шароит таъмин аст шоистаи таҳсин хонда, ба масъулин ҷиҳати тозаю озода нигоҳ доштани боғ ва анҷоми босифати сатҳи хизматрасонӣ ба аҳолӣ дастуру супоришҳои мушаххас доданд.

Аз рӯйи тарҳ дар ин ҷо барои сайругашт ва комил сохтани истироҳати ҷавонону наврасон ва ҳам калонсолон беш аз 10 ҳазор гулу буттаҳои рангоранги мавсимӣ ва 200 бех ниҳоли дарахтони ороишию сояафкан шинонида шудааст. Суҳбаткадаҳои бо нақшу нигори миллӣ оро ёфта, 4 фавораи замонавӣ, 22 нишастгоҳ, 110 чароғаки равшандиҳанда ва дигар иншооти ёрирасоне, ки дар дохили боғи фароғатӣ бунёд гардидаанд, ба ҳар нафар рӯҳу илҳоми тоза мебахшанд. Дарахтон ва гулу буттаҳо ба таври муосир обрасонӣ гардида, роҳравҳои боғи навтаъсис бо санъати баланди меъморӣ сафолакпӯш шудаанд.

Пешвои миллат муҳтарам Эмомалӣ Раҳмон пас аз боздид аз шароити боғи навбунёд дар ҳамин ҷо дар доираи сиёсати инсонпарваронаи хеш бо 50 нафар ятими кулл мулоқот доир намуда, бо онҳо суҳбати самимӣ анҷом доданд.

Тавре таъкид гардид, дастгирии шахсони имконияташон маҳдуд ва яккаву танҳо дар меҳвари сиёсати пешгирифтаи Ҳукумати мамлакат қарор дошта, барои нигоҳубин, ба таҳсил фаро гирифтан ва соҳибшуғл намудани онҳо аз ҷониби давлат тадбирҳои зарурӣ амалӣ мегарданд.
Дар доираи иқдомҳои иҷтимоии роҳбарияти давлат дар ин рӯз 50 нафар ятими кулли муассисаҳои таълимии ноҳияи Данғара бо туҳфаҳои Пешвои миллат, ки аз сару либоси мактабӣ, пойафзол, сарулибоси зимистона, китобҳои бадеӣ ва шириниҳо иборат буд, қадрдонӣ шуданд.

Ифтитоҳи боғи фарҳангию фароғатӣ ва тақдими туҳфаҳо ба ятимон дар ноҳияи Данғара 28.04.2022

Апрель 28, 2022 08:45

Хабарҳои дигари ин бахш

Анҷоми сафари кории Президенти Федератсияи Русия Владимир Путин дар Тоҷикистон
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин мулоқот намуданд
Президенти Федератсияи Русия Владимир Путин бо сафари корӣ ба Тоҷикистон ташриф овард
Дар шаҳри Ҳисор корхонаи саноатии истеҳсоли бомпӯшҳои азбестӣ мавриди истифода қарор гирифт
Дар ноҳияи Кӯшониён пули дарозиаш 85-метра ба истифода дода шуд
ПАЁМИ ШОДБОШИИ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати 25-солагии Рӯзи ваҳдати миллӣ
Пешвои миллат Эмомалӣ Раҳмон роҳбари ширкати «Трафигура Групп» Ҷеремӣ Вейрро ба ҳузур пазируфтанд
Дар Ҳисор ба муносибати Рўзи Ваҳдати миллӣ 17 иншоот ба истифода дода мешаванд
Бахшида ба Рӯзи Ваҳдати миллӣ дар ноҳияи Варзоб 7 иншоот мавриди баҳрабардорӣ қарор мегирад
Пешвои миллат Эмомалӣ Раҳмон дар ноҳияи Данғара бо роҳбарону фаъолони вилояти Хатлон машварати корӣ доир карданд
Суханронии Пешвои миллат Эмомалӣ Раҳмон дар мулоқот бо роҳбарон ва фаъолони вилояти Хатлон
Президенти мамлакат Эмомалӣ Раҳмон дар ноҳияи Данғара коргоҳҳои рангуборкунии матоъ, дӯзандагӣ ва бинои маъмурии ҶДММ «Файзи Карим»-ро ифтитоҳ намуданд