Дар ноҳияи Шаҳринав доир ба пешгирӣ ва муқовимат бар зидди терроризму экстремизм вохӯрӣ доир шуд

ДУШАНБЕ, 20.08.2023 /АМИТ «Ховар»/. Дар Ҷамоати деҳоти ба номи Акрам Ҳасанови ноҳияи Шаҳринав дар мавзуи «Пешгирӣ ва муқовимат бар зидди терроризму экстремизм» бо сокинон  мулоқоти судманд доир шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Шаҳринав хабар медиҳад.

Дар вохӯрӣ роҳбарияти ноҳия, кормандони ҷамоат, мутахассисони бахши кор бо дин ва расму оинҳои миллӣ, имомхатибон, собиқадорон иштирок намуданд. Таъкид гардид, ки омилҳое, ки ба амнияти миллии мамлакат халал ворид менамоянд, терроризму экстремизм мебошанд. Ва ин зуҳуроти номатлуби террористӣ аз давраи аввали соҳибихтиёрӣ то ба имрӯз ба мушоҳида мерасад.

Ҷумҳурии Тоҷикистон ҳамчун узви комилҳуқуқи Созмони Милали Муттаҳид ва ҷузъи ҷудонашавандаи ҷомеаи ҷаҳонӣ ба якчанд санадҳои ҳуқуқии байналмилалӣ алайҳи мубориза бар зидди терроризм шомил гардида, чандин қонун ва стратегияҳои давлатиро қабул намуда, мавриди амал қарор додааст.

Ҷомеаи ҷаҳонӣ ва тамоми сокинони сайёра аз таҳдиди хатари терроризму экстремизм ба амният, оромӣ ва суботи ҷомеа, бехатарии давлат ва ҳаёти шаҳрвандони он бохабар буда, онро ҳамчун хатари глобалӣ маҳкум менамоянд.

АКС: Мақомоти иҷроияи ҳокимияти давлатии ноҳияи Шаҳринав