Футболбозони «Истиқлол» бо пироҳанҳои сурх ва дастаи «Ал-Дуҳайл» бо либосҳои хокистарранг бозӣ менамоянд

ДУШАНБЕ, 18.09.2023 /АМИТ «Ховар»/. Имрӯз, 18 сентябр ҷаласаи пеш аз бозӣ оид ба масъалаҳои ташкилии вохӯрии даври аввали Лигаи чемпионҳои Осиё-2023/24 оид ба футбол байни дастаҳои «Истиқлол»-и Тоҷикистон ва «Ал-Дуҳайл»-и Қатар баргузор гардид. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Дар ҷаласа бо иштироки комиссари бозӣ, нозири доварон, намояндагони дастаҳои «Истиқлол» ва «Ал-Дуҳайл» ва кормандони Федератсияи футболи Тоҷикистон ва дигар масъулин масъалаҳои ташкилӣ оид ба вохӯрии дарпешистода баррасӣ шуданд.

Мизбонони рақобат -футболбозони “Истиқлол” бо пироҳанҳои сурх ва дастаи меҳмон бо либосҳои хокистарранг ба варзишгоҳ мебароянд.

Вохӯрии даври аввали марҳилаи гурӯҳии Лигаи қаҳрамонҳои Осиё-2023/24 байни дастаҳои “Истиқлол”-и Тоҷикистон ва “Ал-Дуҳайл”- и Қатар фардо, 19 сентябр дар Варзишгоҳи марказии ҷумҳуриявии шаҳри Душанбе баргузор мегардад. Оғози бозӣ соати 21:00.

АКС: Федератсияи футболи Тоҷикистон