Рушди ҳамкории Тоҷикистон ва Эрон дар бахшҳои гуногуни технологияҳои иттилоотию коммуникатсионӣ баррасӣ шуд

Февраль 5, 2024 17:35

 ДУШАНБЕ, 05.02.2024 /АМИТ «Ховар»/. Дар ҳошияи Форуми рақамӣ, ки дар Ҷумҳурии Қазоқистон доир шуд, муовини Сардори Хадамоти алоқаи Тоҷикистон Илҳомҷон Атоев  бо  Вазири фанновариҳои иттилоотӣ ва иртиботии Ҷумҳурии Исломии Эрон Исо Зарепур мулоқот  намуд. Дар ин хусус АМИТ «Ховар» бо истинод ба Хадамоти алоқа хабар медиҳад.

Зимни мулоқот ҷонибҳо доир ба рушди ҳамкории дуҷониба дар бахшҳои гуногуни технологияҳои иттилоотию коммуникатсионӣ табодули афкор намуданд. Яке аз бахшҳои асосии мулоқот тақвияти робитаҳо дар доираи муқаррароти «Ёддошти тафоҳуми ҳамкории почтавӣ байни Корхонаи воҳиди давлатии «Почтаи Тоҷик» ва Ширкати миллии почтаи Ҷумҳурии Исломии Эрон» буд.

Ёдовар мешавем, ки моҳи ноябри соли 2023 «Ёддошти тафоҳуми ҳамкории почтавӣ байни  «Почтаи Тоҷик» ва Ширкати миллии почтаи Ҷумҳурии Исломии Эрон» ба имзо расид.

Ба имзо расидани ёддошт дар соҳаи почта заминаи ҳамкориро байни Тоҷикистон ва Эрон дар ин бахши соҳаи алоқа тақвият бахшида, ба рушди ҳамгироии боэътимод мусоидат менамояд.

Бояд гуфт, ки муовини Сардори Хадамоти алоқаи Тоҷикистон Илҳомҷон Атоев дар ҷаласаи роҳбарони вазорату идораҳои давлатҳои аъзои Созмони ҳамкории Шанхай  барои рушди технологияҳои иттилоотию коммуникатсионӣ ва панелҳои он, ки дар шаҳри Алматои Ҷумҳурии Қазоқистон доир шуд, иштирок намуд.

Иштирокчиён табодули таҷрибаи пешқадам дар соҳаи технологияҳои иттилоотӣ ва коммуникатсионӣ дар давлатҳояшон, рақамикунонии иқтисодиёти давлатҳои Созмон, мушкилот ва дурнамои рақамисозӣ барои рушди устувор, нақшаҳо ва дурнамои рушдро баррасӣ намуданд.

Роҳбарони вазорату идораҳои  масъули рушди технологияҳои иттилоотию коммуникатсионӣ инчунин мушкилоти мавҷудаи нобаробарии рақамиро байни давлатҳо ва гурӯҳҳои иҷтимоӣ иброз намуданд.

Бо мақсади мусоидат ба шарикии рақамӣ барои рушди устувори иқтисодиёти рақамӣ ҷонибҳо ба мувофиқа расиданд, ки робитаҳои барқароршударо нигоҳ дошта ва таҳким бахшида, табодули таҷрибаи пешқадам дар соҳаи технологияҳои иттилоотӣ ва коммуникатсиониро идома диҳанд ва ба ин восита ба коҳиши мунтазами нобаробарии рақамӣ мусоидати фаъол намоянд.

Иштирокчиёни вохӯрӣ андешаҳояшонро ҷиҳати амиқтар намудани ҳамкорӣ дар самти рушди трансформатсияи рақамӣ ва иқтисодиёти рақамӣ ва ба ин васила такони нав бахшидан ба рушди инноватсионӣ ва технологии иқтисодиёти давлатҳои Созмони ҳамкории  Шанхай  баён намуданд.

Ҳамчунин ҷонибҳо ба мувофиқа расиданд, ки барои пешбурди қарорҳои ҳукумати электронӣ, табодули дониш дар бораи таҷрибаи муваффақ ва омӯхтани имконияти лоиҳаҳои муштарак ҳамкорӣ намоянд.

Ҷаласаи навбатии роҳбарони вазорату идораҳои давлатҳои аъзои Созмони ҳамкории  Шанхай  барои рушди технологияҳои иттилоотию коммуникатсионӣ соли 2025 баргузор мешавад.

София ШОИК,
АМИТ «Ховар» 

АКС: АМИТ «Ховар»

Февраль 5, 2024 17:35

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст