35-СОЛАГИИ ИСТИҚЛОЛИ ДАВЛАТӢ. Дар ноҳияи Темурмалик 258 иншоот бунёд ва барқарор карда мешаванд

ТЕМУРМАЛИК, 06.04.2024 /АМИТ «Ховар»/. Бахшида ба ҷашни 35-солагии Истиқлоли давлатии Ҷумҳурии Тоҷикистон дар ноҳияи Темурмалики вилояти Хатлон бунёду барқарорсозии 258 иншооти таъйиноти гуногун ба нақша гирифта шудааст. То имрӯз 88 адади он  ба истифода дода шуда, дар 170 иншооти дигар сохтмон идома дорад. Дар ин хусус хабарнигори минтақавии АМИТ «Ховар» Сулаймон Холзода хабар медиҳад. 

Инчунин  дар ноҳия  дар баробари корҳои созандагӣ  ва тозаю озода намудани муҳити зист аҳолӣ ва ташкилоту муассисаҳо ба  шинонидани ниҳолҳои ороишию сояафкан  ва гулу  гулбуттаҳо шуруъ намудаанд.

Бино ба иттилои сардори бахши ҳифзи муҳити зисти  ноҳияи Темурмалик Файзиддин Нурзода, маъракаи ниҳолшинонӣ дар ду паҳлуи шоҳроҳи Данғара-Темурмалик-Балҷувон идома дошта, то 2 ҳазор ниҳоли ороишию сояафкан шинонида мешавад. Дар баробари ин кормандони корхонаю ташкилот дар назди биноҳои маъмурӣ гулу бутта ва ниҳол мешинонанд.

Зимни шинонидани ниҳолҳо қоидаҳои агротехникӣ риоя шуда, сокинон ва кормандони ташкилот барои нигоҳубини ниҳолҳо муваззаф мешаванд.

АКС: АМИТ «Ховар»