Чаро маркази ҷамоати деҳоти Меҳрободи ноҳияи Нуробод ба партовгоҳ табдил ёфтааст?

Май 15, 2024 11:24

НУРОБОД, 15.05.2024 /АМИТ «Ховар»/. Ҷамоати Меҳрободи ноҳияи Нуробод дар замони гузашта маркази ноҳияи Нуробод ба ҳисоб мерафт. Мутаассифона, дар айни замон аз сабаби бемасъулиятии роҳбарони Ҷамоати деҳоти Меҳробод, бахши ҳифзи муҳити зисти ноҳия, Маркази назорати давлатии санитарию эпидемиологӣ ва Хоҷагии манзилию коммуналии ноҳия мавзеъҳои атрофи ҷамоат ба партовгоҳ табдил гардидаанд. Ҳамчунин макони тақсимоти оби нӯшокии як қисми аҳолӣ, атрофи Мактаб-интернати ҷумҳуриявии ноҳияи Нуробод ва муассисаи таълимии ҷамоат ба талаботи санитарию гигиенӣ мутобиқ нест.

Зимни нишасти матбуотии Раиси ноҳияи Нуробод вобаста ба ҷамъбасти соли 2023 хабарнигори минтақавии АМИТ «Ховар» Субҳониддини Маҳмуд аз масъулин сабабҳои ба партовгоҳ табдил додану ба талаботи санитарӣ ҷавобгӯ набудани маркази ҷамоати деҳоти Меҳрободро пурсон шуд. Мутаассифона, масъулини ноҳия ин мушкилиро тасдиқ намуда, гуфтанд, ки як қисми партовгоҳро бо хок пур кардаанд ва қисми дигари онро низ бо хок пур менамоянд.

Вале саволе пайдо мегардад, ки масъулини Мақомоти иҷроияи ҳокимияти давлатии ноҳияи Нуробод ва Ҷамоати деҳоти Меҳробод чаро барои баланд бардоштани маърифати экологии шаҳрвандон нуқтаҳои партовҷамъкунӣ ташкил наменамоянд? Чаро Хоҷагии манзилию коммуналии ноҳия партовро ба партовгоҳи расмии ноҳия намекашонад?

2 ноябри соли 2012 бо мақсади пешгирии ифлосшавии муҳити зист, кам кардани ҳаҷми ҳосилшавии партовҳо ва мукаммал намудани механизми баҳисобгирии онҳо Қарори Ҳукумати Ҷумҳурии Тоҷикистон дар бораи Тартиби ошкор кардан ва ба ҳисоб гирифтани партовҳои бесоҳиб баромада буд, вале Мақомоти иҷроияи ҳокимияти давлатии ноҳияи Нуробод ин қарори ҳукуматро амалӣ намекунад ва бо сабаби гузаштани зиёда аз даҳ сол иҷрои ин қарори Ҳукумати Ҷумҳурии Тоҷикистон дар ноҳияи Нуробод таъмин нагардидааст.

Аз ҳамин сабаб партовҳо дар сатҳи мақомоти маҳалӣ назорат карда намешаванду маркази ҷамоати деҳоти Меҳробод ба партовгоҳ табдил ёфтааст. Ин ҳолат ба ҳифзи муҳити зист ва саломатии одамон таъсири бад мерасонад.

Мақомоти иҷроияи ҳокимияти давлатии ноҳияи Нуробод вазифадор мебошад, ки дар асоси дастуру супоришҳои Ҳукумати Ҷумҳурии Тоҷикистон ва қарорҳои Ҳукумати мамлакат дар маҳалҳои аҳолинишин нуқтаҳои партовҷамъкунии расмӣ бунёд намуда, механизми базараргардонию интиқоли онро ба партовхонаи ноҳия ё дигар партовхонаҳои расмӣ ташкил намояд.

Дар зер суратгузориш аз ҷои воқеа манзури хонандагон мегардад. Тавре ки мегӯянд, «шунидан кай бувад монанди дидан».

 

Субҳониддини МАҲМУД,
АМИТ «Ховар»

АКС: АМИТ «Ховар»

Май 15, 2024 11:24

Хабарҳои дигари ин бахш

МО ҶАВОНЕМ, МО ҶАВОНЕМ, МО ҶАВОН! Дар Тоҷикистон зиёда аз 2 миллион нафарро ҷавонон ташкил медиҳанд
РИСОЛАТИ ТАЪРИХИИ ҲИЗБИ ХАЛҚИИ ДЕМОКРАТИИ ТОҶИКИСТОН ДАР ТАҲКИМИ ПОЯҲОИ ИСТИҚЛОЛИ ДАВЛАТӢ. Андешаҳо ба ифтихори 30-солагии таъсиси ҳизб
СОЛИ МАЪРИФАТИ ҲУҚУҚӢ. Расонидани ёрии ҳуқуқии ройгон ифодагари ғамхории Пешвои миллат нисбат ба мардуми Тоҷикистон аст
«СИФАТИ ХИЗМАТРАСОНИИ ТИББӢ». Доир ба беҳтар намудани кумаки статсионарӣ ба модарон, навзодон ва кӯдакон машғулият доир гардид
Давоми шабонарӯзи охир бар асари бориши шадид дар минтақаҳои гуногуни Тоҷикистон сел ба амал омад
Бахшида ба Рӯзи ҷавонони Тоҷикистон Вазири корҳои дохилӣ бо ҷавонони фаъол вохӯрӣ намуд
Директори Хазинаи байналмилалии асъор бо занони пешсафи тоҷик мулоқот намуд
МОҲВОРАИ ҶАВОНОН. Дар шаҳри Бохтар Фестивали бозиҳои миллӣ баргузор гардид
«МАКТАБИ СИЁСИИ ПЕШВОИ МИЛЛАТ». Таҳти чунин унвон конференсияи 4-уми байналмилалии илмӣ-амалӣ доир шуд
БАХШИДА БА РӮЗИ ҶАВОНОНИ ТОҶИКИСТОН. Дар ноҳияи Панҷ бо афсарону сарбозони қисмҳои ҳарбӣ вохӯрӣ доир гардид
Дар Душанбе масъалаи фарогирии умумӣ ба хизматрасонии тандурустӣ баррасӣ гардид
Дар Душанбе бо намояндагони созмонҳои байналмилалӣ оид ба коҳиши хатари офатҳои табиӣ мулоқот доир гардид