Дар Душанбе нишасти матбуотии Сафири Ҷумҳурии Исломии Эрон дар Тоҷикистон баргузор гардид

Май 24, 2024 15:01

ДУШАНБЕ, 24.05.2024 /АМИТ «Ховар»/. Имрӯз дар Душанбе Сафири Ҷумҳурии Исломии Эрон дар Тоҷикистон Алиризо Ҳақиқиён барои намояндагони воситаҳои ахбори омма нишасти матуботӣ баргузор кард, хабар медиҳад АМИТ «Ховар».

Зимни нишасти матбуотӣ Сафири Ҷумҳурии Исломии Эрон дар Тоҷикистон Алиризо Ҳақиқиён изҳор дошт, ки «аз номи давлат ва мардуми кишвари Эрон ташаккур ва қадрдонии худро аз мақомоти олимақоми Тоҷикистон, хусусан Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ, ҳамчунин мардуми шарифи Тоҷикистон ба хотири ибрози ҳамдардӣ ва тасаллият ба давлат ва мардуми Эрон бобати шаҳодати Президенти Ҷумҳурии Исломии Эрон Сайидиброҳим Раисӣ, вазири корҳои хориҷии Эрон Амирабдуллоҳиён ва ҳамроҳонаш эълом менамоям».

Дар идомаи нишасти хабарӣ таъкид гардид, ки Президенти Ҷумҳурии Исломии Эрон Сайидиброҳим Раисӣ самимона алоқаманди мардуми Тоҷикистон буд. Ҳамин аст, ки нахустин сафари расмии хориҷиашро маҳз ба Тоҷикистон анҷом дод. Президенти Ҷумҳурии Исломии Эрон Сайидиброҳим Раисӣ дар оғози кори давлатӣ равобити дӯстона ва самимонаи худро бо Президенти Ҷумҳурии Тоҷикистон муҳтарам Эмомалӣ Раҳмон барқарор намуд. Дар ҳамин замина сафари расмии Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Исломии Эрон баъд аз 8 сол баргузор шуд. Таҳти роҳбарии Президентони ду мамлакат ҳамкории судманди Тоҷикистон ва Эрон дар самтҳои дуҷониба, минтақавӣ ва байналмилалӣ авҷ гирифт.

Гуфта шуд, ки давоми фаъолияти Президенти Ҷумҳурии Исломии Эрон Сайидиброҳим Раисӣ 5 мулоқоти Президентони ду мамлакат дар фазои дӯстона, бародарона ва самимона баргузор гардид.

Ҳамчунин дар даврони президентии Сайидиброҳим Раисӣ нахустин сафари расмии Раиси Маҷлиси миллии Маҷлиси Олии Тоҷикистон муҳтарам Рустами Эмомалӣ ба Теҳрон доир гардид.

Ба иттиллои Сафири Ҷумҳурии Исломии Эрон дар Тоҷикистон Алиризо Ҳақиқиён, давоми се соли гузашта бештар аз сад ҳайати сиёсӣ, иқтисодӣ ва фарҳангӣ байни Тоҷикистон ва Эрон табодул шуда, зиёда аз 50 санади ҳамкорӣ дар бахшҳои иқтисодӣ, тиҷоратӣ, сайёҳӣ, фарҳангӣ ва илмӣ ба тасвиб расиданд. Дар умум, ҳаҷми додугирифти иқтисодии Тоҷикистон ва Эрон аз 60 миллион доллар то ба 320 миллион доллар афзуд. Ҳоло байни ду мамлакат 4 парвози мустақим дар як ҳафта анҷом дода мешавад.

Ҳамчунин соли 2022 дар шаҳрҳои Теҳрон, Шероз ва Табрез Рӯзҳои фарҳанги Ҷумҳурии Тоҷикистон ва худи ҳамон сол дар шаҳрҳои Душанбе, Бохтар, Кӯлоб ва Хуҷанд Рӯзҳои фарҳанги Эрон бо ҳузури садҳо намояндагони аҳли ҳунар ва адаби ду давлати дӯст ва бародар гузаронида шуданд.

Дар нишасти хабарӣ ҳамчунин аз нақш ва саҳми густурдаи вазири корҳои хориҷии Эрон Амирабуддулоҳиён ёдовар шуданд. Таъкид карда шуд, ки дар раванди инкишофи муносибатҳои ду мамлакати дӯст, бародар ва ҳамфарҳангу ҳамзабон вазири корҳои хориҷии Эрон Амирабуддулоҳиён нақши муассир дошт.

Хотиррасон менамоем, ки 19 май Президенти Ҷумҳурии Исломии Эрон шодравон Саидиброҳим Раисӣ ва ҳайати ҳамроҳаш бар асари суқути чархбол ба таври фоҷеавӣ ба ҳалокат расиданд.

22 май Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади иштирок дар маросими видоъ ва изҳори таъзия бинобар даргузашти фоҷеавии Президенти Ҷумҳурии Исломии Эрон Сайидиброҳим Раисӣ ба шаҳри Теҳрони Ҷумҳурии Исломии Эрон ворид шуданд.

Президенти Ҷумҳурии Тоҷикистон муҳтарам Эмомалӣ Раҳмон дар шаҳри Теҳрон дар маросими азои фавтидагони фоҷеа — Президенти Ҷумҳурии Исломии Эрон Сайидиброҳим Раисӣ ва ҳамроҳонаш иштирок намуданд.

Сарвари давлати Тоҷикистон муҳтарам Эмомалӣ Раҳмон ба Муовини аввали Президенти Ҷумҳурии Исломии Эрон муҳтарам Муҳаммад Мухбир, мардуми дӯсту бародари Эрон ва наздикону пайвандони шаҳидшудагон ҳамдардии амиқ баён намуданд.

Зимни изҳори ҳамдардӣ Пешвои миллат муҳтарам Эмомалӣ Раҳмон аз нақши арзишманди шодравон Сайидиброҳим Раисӣ дар густаришу таъмиқи робитаҳои дӯстӣ ва ҳамкории гуногунҷанба дар байни Ҷумҳурии Тоҷикистон ва Ҷумҳурии Исломии Эрон ёдовар шуданд.

Акрам САНГЗОДА,
Зоирҷони ТОИРЗОД (АКС)
АМИТ «Ховар»

Май 24, 2024 15:01

Хабарҳои дигари ин бахш

Суратгузориш аз рафти саёҳати матбуотии хабарнигорони Чин дар Тоҷикистон
30 ҚАДАМИ СОЗАНДА ДАР АМРИ ВАТАНСОЗӢ. Таҳти ин унвон дар Ҳисор Фестивал – озмуни «Ташкилоти беҳтарини сол» баргузор мешавад
Саёҳати матбуотии бомувафаққи хабарнигорони рӯзномаи «Жэнмин Жибао» дар пойтахти Тоҷикистон
Дар Академияи ВАО-и Тоҷикистон вобаста ба самти сохтмон, меъморӣ ва шаҳрсозӣ машғулияти омӯзишӣ оғоз шуд
«ИЛОҶИ ВОҚЕА ПЕШ АЗ ВУҚУЪ». Ҳангоми оббозӣ қоидаҳои бехатариро риоя карда, фарзандонро беназорат нагузоред!
САЛОМ, ТОБИСТОН! Истироҳатгоҳи «Шабдез»-и ноҳияи Роштқалъа ба қабули наврасон шуруъ мекунад
Операторро иваз кардан мехоҳам. Чӣ тавр рақамҳои лозимиро гум накунем?
ДАР ПАРТАВИ ҲИДОЯТҲОИ ПЕШВОИ МИЛЛАТ. Дар Душанбе, Кӯлоб ва Ховалинг ба 2200 ниёзманд кумак расонида шуд
«СУҒД-2024». Дар ин ярмаркаи байналмилалӣ 500 нафар меҳмон аз дохил ва хориҷи Тоҷикистон иштирок менамояд
Имрӯз дар Тоҷикистон ҳавои тағйирёбандаи бебориш пешгӯӣ мешавад
Имрӯз дар шаҳри Душанбе ҳаво то 35 дараҷа гарм мешавад
Кумитаи меъморӣ ва сохтмони Тоҷикистон баҳри густариши раванди рақамикунонӣ Созишнома ба имзо расонид