Дар Тоҷикистон «Долони сабз» — и намунавӣ бунёд карда мешавад

Ноябрь 11, 2024 17:07

ДУШАНБЕ, 11.11.2024. /АМИТ «Ховар»/. Бонки Осиёии рушд (БОР) кумаки молиявии (гранти) иборат аз 86,67 миллион доллари Иёлоти Муттаҳидаи Амрикоро барои такмили минбаъдаи шабакаи миллии роҳҳои Тоҷикистон тавассути таъсиси “долони сабз”-и намунавӣ дар мамлакат тасдиқ намуд. Дар ин хусус АМИТ «Ховар» бо истинод ба Вазорати нақлиёти Ҷумҳурии Тоҷикистон хабар медиҳад.

Тавре хадамоти матбуоти Бонки Осиёии рушд хабар додааст, дар доираи лоиҳа бори аввал усулҳои инноватсионии бунёди роҳҳои “сабз” санҷида мешаванд. Дар назар аст, ки роҳи автомобилгарди «Данғара – Гулистон» навсозӣ гардида, ба «долони сабз»-и намунавӣ табдил дода шавад.

Лоиҳа таҷдиди роҳи дуқатораи мавҷудаи ҳоло фарсудашудаи «Данғара – Гулистон» (дарозиаш 49 км) ва васеъ кардани онро то чор қатор пешбинӣ менамояд. Барои татбиқи лоиҳа Ҳукумати Ҷумҳурии Тоҷикистон 23 миллион доллари ИМА маблағгузорӣ мекунад. Бонки аврупоии рушд (БАР) пас аз тасдиқи расмӣ аз ҷониби шурои директорони бонк дар аввали соли 2025 ба маблағи 40 миллион доллари ИМА қарз медиҳад. Иҷрокунандаи ин лоиҳа, ки татбиқи он бояд то соли 2030 ба анҷом бирасад, Вазорати нақлиёти Ҷумҳурии Тоҷикистон мебошад.

Роҳи «Данғара – Гулистон», ки солҳои 1930-юм сохта, солҳои 1970-ум навсозӣ шуда буд, аввалин роҳ дар Тоҷикистон хоҳад буд, ки бо унсурҳои мутобиқшавӣ ба тағйирёбии иқлим ва тарҳи махсус сохта шуда, манфиати занону духтаронро низ дар бар мегирад.

Ёдовар мешавем, ки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Паём ба Маҷлиси Олӣ 28 декабри соли 2023 роҳи «Данғара – Гулистон»-ро дар қатори иншооти бунёдшавандаи нақлиётӣ яке аз роҳҳои муҳими минтақавии мамлакат арзёбӣ намуданд.

«Мо тасмим гирифтаем, ки бо амалисозии ҳадафҳои муайянкардаамон дар панҷ-шаш соли оянда ҳамаи роҳҳои байналмилалӣ ва ҷумҳуриявии мамлакатро ба меъёрҳои сатҳи ҷаҳонӣ мутобиқ гардонем, – гуфтанд Сарвари давлат. – Яъне бунёди роҳҳои муосир ояндаи наздик ба мо имкон медиҳад, ки ба ҳадафи стратегиамон – ба мамлакати транзитӣ табдил додани Тоҷикистон ноил шуда, рушди устувори иқтисодӣ ва боз ҳам беҳтар гардидани шароити зиндагии халқамонро таъмин намоем».

Роҳ дар оянда чӣ гуна хоҳад шуд

Роҳи автомобилгарди фарсудашудаи дуқатораи 49-километра ба роҳи чорқатора табдил дода, ба он роҳҳои велосипедронӣ ва роҳравҳо барои занони кӯдакдор ва одамони имконияташон маҳдуд илова карда мешаванд.

Дар шоҳроҳ равшанӣ беҳтар карда шуда, гузаргоҳҳои бехатар ва бо аломатҳо хуб муҷаҳҳазшуда сохта мешаванд. Тарроҳии онҳо дар ҷараёни тарҳрезии муштарак бо назардошти фикри аҳли ҷомеа муайян мегардад.

Ҳоҷатхонаҳо ва утоқҳои ҷудогона барои модарон ва кӯдакон бунёд ва дар нақлиёти ҷамъиятӣ ҷойҳои имтиёзнок барои маъюбон пешбинӣ карда мешаванд.

Азбаски норасоии истгоҳҳои зарядпуркунӣ дар деҳот афзоиши эҳтимолии ин бозорро дар Тоҷикистон маҳдуд мекунад, дар доираи лоиҳа ду истгоҳи зарядпуркунии озмоишӣ сохта мешавад. Ҳамчунин чаҳорчӯбаи сармоягузорӣ барои ҳавасмандгардонии сармоягузории хусусӣ дар рушди ин бахш таҳия карда мешавад.

Барои беҳтар кардани шуғли сокинони маҳаллӣ лоиҳа омӯзиши занонро ба соҳибкорӣ бо додани грантҳо барои кушодани тиҷорат ташкил мекунад.

Дар бораи роҳҳои «сабз»

Чунин роҳҳо тибқи Барномаи Бонки Осиёии рушд оид ба бунёди роҳҳои «сабз», ки дар ҳамкорӣ бо Федератсияи байналмилалии роҳҳо ва MetaMeta Research (Нидерландия) таҳия гардидааст, сохта мешаванд.

Барнома ба муҳандисон, тарроҳон, тасмимгирандагон ва таҷрибаомӯзон дар бунёди роҳҳои «сабз» дар минтақаҳои Осиё ва Уқёнуси Ором бо назардошти ҳадафҳои иқтисодӣ, иҷтимоӣ ва экологӣ кумак менамояд.

АКС: Вазорати нақлиёти Ҷумҳурии Тоҷикистон

 

Ноябрь 11, 2024 17:07

Хабарҳои дигари ин бахш

Байни сохторҳои мониторинги молиявии Тоҷикистону Русия ду санади ҳамкорӣ ба имзо расид
Дар доираи COP31 Тоҷикистон, Умон ва Непал роҳҳои ҳалли мушкилоти обу иқлимро баррасӣ карданд
Соли 2027 дар гузаргоҳи гумрукии ноҳияи Спитамен сохтмон ва насби таҷҳизоти сканкунии борҳо оғоз мегардад
Ҷаласаи 45-уми пленарии Гурӯҳи Авруосиё ба таъмини амнияти иқтисодию молиявӣ мусоидат менамояд
Ҳайати Тоҷикистон дар чорабинии сатҳи баланди вазирони Осиёи Марказӣ оид ба тағйирёбии иқлим иштирок намуд
Дар Фурудгоҳи байналмилалии Душанбе беш аз 3,5 кило маснуоти тиллоӣ мусодира карда шуд
Фонди иқлими сабз барои рушди соҳаи тандурустии Тоҷикистон 2 миллион доллар ҷудо менамояд
Лоиҳаи «Барномаи нави саноатикунонии босуръати Тоҷикистон барои солҳои 2026-2030» таҳия гардидааст
Масъалаҳои баргузории Форуми B5+1 дар Душанбе баррасӣ шуданд
Тоҷикистон ба Конвенсияи СММ оид ба мубориза бо биёбоншавӣ пешниҳод намуд, ки соли 2027 миссияи техникӣ ташкил карда шавад
Бо сабаби фаъолият накардани корхонаи «Хишти Тоҷикобод» сокинон ин масолеҳи сохтмониро аз Душанбе ва Ваҳдат бо роҳкирои гарон ворид менамоянд
Дар Минтақаи озоди иқтисодии «Ишкошим» ба маблағи беш аз 1 миллион сомонӣ кору хизматрасонӣ анҷом дода шуд