Дар Тоҷикистон ҷарроҳии мураккаби барқарорсозии шунавоӣ гузаронида мешавад

ДУШАНБЕ, 15.01.2025. /АМИТ «Ховар»/. Дар Тоҷикистон аз ҷониби табибони гӯшу гулӯ ва бинӣ барои шахсони камшунавои дараҷаи баланд ва шахсони ношунавои мутлақ ҷарроҳии мураккаби барқарорсозии шунавоӣ гузаронида мешавад. Ин яке аз усулҳои ҷарроҳии муосир мебошад, ки давоми як сол аст дар ҷумҳурӣ гузаронида мешавад.

Тавре дар маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» иттилоъ доданд, дар Маркази миллии тиббии Тоҷикистон «Шифобахш» ин ҷарроҳӣ дар амал татбиқ шуда, шунавоии ҳама нафарони ҷарроҳишуда барқарор шуда, нутқ ва гуфторашон марҳила ба марҳила барқарор мегардад.

Агар шахси камшунаво ва ношунавои мутлақ ҳарчи зудтар муроҷиат кунад, ҳамон қадар табобати бемор осонтар мешавад.

Барои ташхис ва табобати ин гуна бемориҳо имрӯз дар тамоми таваллудхонаҳои мамлакат дастгоҳҳое, ки ношунавоӣ ва камшунавоиро муайян мекунанд, вуҷуд доранд. Инчунин дар утоқҳои махсусгардонидаи аудиологӣ дастгоҳҳо ва мутахассисоне ҳастанд, ки ин гуна ташхисҳоро муайян менамоянд.

 АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон