Федератсияи футболи Тоҷикистон бозигарони боистеъдодро интихоб менамояд

ДУШАНБЕ, 28.04.2025 /АМИТ «Ховар»/. Федератсияи футболи Тоҷикистон дар чаҳорчӯби лоиҳаи рушди истеъдодҳои «Talent Development Scheme» футболбозони ҷавони болаёқатро пас аз санҷиш интихоб менамояд.

Тавре ба АМИТ «Ховар» аз Федератсияи футболи Тоҷикистон хабар доданд, мақсади ин иқдом дарёфти бозигарони боистеъдоди дорои малакаи хуб ва фароҳам овардани шароит барои рушди минбаъдаи онҳо мебошад.

Дар чорабиниҳои интихобӣ, ки дар манотиқи мухталифи мамлакат  баргузор мешаванд, футболбозони навраси соли таваллудашон 2011 иштирок менамоянд. Беҳтаринҳо ба Академияи футболи Федератсияи футболи Тоҷикистон даъват карда мешаванд.

Онҳо имкон пайдо мекунанд, ки таҳти роҳбарии мутахассиси испанӣ тамрин намуда, тибқи барномаҳои муосир таҳсил кунанд ва ба баромад дар мусобиқаҳои дохилию байналмилалӣ омодагӣ гиранд.

АКС: Федератсияи футболи Тоҷикистон