Ингминг Янг: «Бонки Осиёии рушд ҳамкории судмандро бо Тоҷикистон мутобиқ ба стратегияи шарикии мамлакат таҳким мебахшад»
ДУШАНБЕ, 28.05.2025 /АМИТ «Ховар»/. «Бо хушнудӣ таъкид менамоям, ки маротибаи аввал ба Ҷумҳурии Тоҷикистон ташриф оварда, бо фарҳанги ғанӣ ва меҳмоннавозии гарми мардуми тоҷик аз наздик шинос шудам», — гуфт ноиби Президенти Бонки Осиёии рушд Ингминг Янг зимни нишасти хабарӣ бо рӯзноманигорон баъд аз мулоқот бо Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон.
Ингминг Янг иброз дошт, ки дар мулоқот бо Президенти Ҷумҳурии Тоҷикистон муҳтарам Эмомалӣ Раҳмон масоили муҳими рушди иқтисодӣ ва тавсеаи ҳамкории дуҷониба байни Тоҷикистон ва Бонки Осиёии рушд баррасӣ гардид.
«Мо бар он назарем, ки рушди устувори мамлакат бояд ба воситаи тақвияти бахши хусусӣ, таъсиси ҷойи нави кор, рушди инфрасохтор, густариши рақамикунонии иқтисод ва истифодаи манбаъҳои энергияи «сабз» амалӣ гардад», — таъкид намуд Ингминг Янг.
Ноиби Президенти Бонки Осиёии рушд изҳор намуд, ки рушди соҳаҳои иҷтимоӣ, махсусан таҳсилоти касбӣ ва омӯзиши малакаҳои нав дар шароити муосири тағйирёбандаи иқтисодӣ ва экологӣ барои беҳбуди зиндагии мардум аҳамияти бузург дорад. Таъкид шуд, ки ҳамкории Тоҷикистон ва Бонки Осиёии рушд аз соли 1998 инҷониб идома дошта, то имрӯз бонк ба мамлакат зиёда аз 2,7 миллиард доллари ИМА кумаки молиявӣ ҷудо намудааст.
Ингминг Янг инчунин иттилоъ дод, ки бонк барномаи нави минтақавии «Пирях ва хоҷагиҳо – (Glacier to Farms)»-ро амалӣ менамояд. Ҳадафи он истифодаи устувори захираҳои об, таъмини амнияти озуқаворӣ ва ҳимояи муҳити зист дар Тоҷикистон ва дигар кишварҳои минтақа мебошад.
«Бонки Осиёии рушд ҳамкории амиқ ва пурмуҳтавои худро бо Ҷумҳурии Тоҷикистон баланд арзёбӣ намуда, минбаъд низ омода аст дар самтҳои афзалиятноки рушди мамлакат мутобиқ ба стратегияи шарикии мамлакат ва барномаҳои миллии рушд дастгирии худро идома диҳад», — изҳор дошт ноиби Президенти бонк.
Дар анҷом Ингминг Янг аз имкони вохӯрӣ бо роҳбарияти олии мамлакат ва муколамаи созандаи дуҷониба изҳори миннатдорӣ намуда, гуфт, ки ин ҳамкории судманд дар оянда боз ҳам таҳким хоҳад ёфт.
Ёдовар мешавем, ки ноиби Президенти Бонки Осиёии рушд Ингминг Янг барои иштирок дар аввалин Конфронси байналмилалии сатҳи баланд оид ба ҳифзи пиряхҳо ба Душанбе ташриф овардааст.
АКС: АМИТ «Ховар»
ИМРӮЗ — РӮЗИ КОРМАНДОНИ МАҚОМОТИ НАЗОРАТИ ДАВЛАТИИ МОЛИЯВӢ ВА МУБОРИЗА БО КОРРУПСИЯ. Аз таъсиси Агентии назорати давлатии молиявӣ ва мубориза бо коррупсия 19 сол пур шуд
Неругоҳи барқи обии «Себзор» давоми фаъолият беш аз 21 миллион кВт-соат неруи барқ истеҳсол намудааст
Баҳодур Шерализода: «Қабули Қатъномаи ЮНЕП дар пешбурди дипломатияи муҳити зисти Тоҷикистон нақши назаррас дорад»
Агентии «Тоҷикстандарт»: «Аз маҳсулоти ширкати «Nestle» бо тамғаи NAN дар марҳилаи муайяншуда истифода набаред!»
Тоҷикистон ҳамкориро бо Бонки осиёии сармоягузории инфрасохторӣ тақвият медиҳад
Бонки миллии Тоҷикистон: иттилои паҳншуда дар бораи он, ки Бонки миллӣ бо 1 фоиз қарз медиҳад, воқеият надорад
Дар Ишкошим зеристгоҳи барқии «Қозидеҳ» ба истифода дода мешавад
Дар Вазорати рушди иқтисод ва савдо оид ба иҷрои супоришҳои Президенти Тоҷикистон дар Паём ба Маҷлиси Олӣ ҷаласа доир шуд
Дар Тоҷикистон лоиҳаи Қонун дар бораи сиёсати аграрӣ таҳия мегардад
Дар Панҷакент ҷаласаи Шуро оид ба рушди соҳибкорӣ ва беҳтар намудани фазои сармоягузорӣ баргузор гардид
ТАШАББУСҲОИ ТОҶИКИСТОН ДАР СОҲАИ ОБУ ИҚЛИМ. Аз соли 1940 то соли 2017 — дар ҳар даҳсола аз +0,1 то +0,2 дараҷа ҳарорати ҳаво баланд шудааст
Дар хоҷагии ҷангали ноҳияи Данғара дар 44 гектар ниҳолҳои пистаҳои хушкшуда барқарор гардид
