Сафири Тоҷикистон бо Вазири авиатсияи граждании Миср мулоқот намуд

ДУШАНБЕ, 09.05.2025 /АМИТ «Ховар»/. Сафири Фавқулода ва Мухтори Ҷумҳурии Тоҷикистон дар Ҷумҳурии Арабии Миср Парвиз Мирзозода бо Вазири авиатсияи граждании Миср Сомеҳ Ҳефнӣ мулоқот намуд.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, ҷонибҳо фаъолгардонии парвози мустақими ҳавопаймоҳо байни Тоҷикистону Мисрро рӯзҳои наздик нишонаи тамоюли ду мамлакат ба густариши робитаҳо дониста, масоили марбут ба рушди соҳаи авиатсия ва сайёҳиро байни Тоҷикистон ва Миср баррасӣ намуданд.

Ёдовар мешавем, ки 11 май ширкати ҳавопаймоии «Сомон Эйр» дар ҳамкорӣ бо ширкати «АНТАРЕС» (FLY.TJ) ба шаҳри Шармушшайхи Ҷумҳурии Мисри Араб парвозҳои мустақимро оғоз менамояд.

Парвозҳо ҳафтае як маротиба рӯзҳои якшанбе аз тариқи ҳавопаймоҳои бароҳати Боинг 737-800 ва Боинг 737-900 анҷом дода мешаванд. Давомнокии парвоз аз Душанбе ба Шармушшайх 5 соату 30 дақиқа ва дар бозгашт 5 соатро ташкил медиҳад.

АКС: Вазорати корҳои хориҷии Ҷумҳурии Тоҷикистон