Соли 2025 коргоҳи дӯзандагии «Чевар» 45 ҳазор либоси мактабӣ истеҳсол менамояд

ДУШАНБЕ, 17.07.2025 /АМИТ «Ховар»/. Дар шаш моҳи соли равон дар коргоҳи дӯзандагии «Чевар»-и ноҳияи Рӯдакӣ беш аз 27 ҳазор либоси мактабӣ истеҳсол гардидааст. Нақшаи истеҳсол барои соли 2025  45 ҳазор либоси мактабиро ташкил медиҳад. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Рӯдакӣ хабар доданд.

Дар коргоҳи дӯзандагии «Чевар» дӯхти либоси мактабӣ ва қолинбофию атласбофӣ ба роҳ монда шудааст.  Дар ин коргоҳ занони соҳибҳунар фаъолият намуда, ҷавондухтарони хоҳишманди ноҳия ба касбу ҳунаромӯзӣ ҷалб гардидаанд.

Ин коргоҳ дар асоси  дастуру супоришҳои Пешвои миллат муҳтарам Эмомалӣ Раҳмон бо ибтикори Мақомоти иҷроияи ҳокимияти давлатии ноҳияи Рӯдакӣ барои дастгирии ҳунармандон, рушди ҳунарҳои мардумӣ, эҳёи ҳунарҳои дастӣ ва омӯзиши касбу ҳунарҳои миллӣ таъсис дода шудааст.

АКС: Мақомоти иҷроияи ҳокимияти давлатии ноҳияи Рӯдакӣ