НИШАСТИ МАТБУОТӢ. Донишҷӯёни Консерваторияи миллӣ дар озмунҳои байналмилалӣ ҷойҳои намоёнро гирифтанд

ДУШАНБЕ, 01.08.2025. /АМИТ «Ховар»/. Дар Консерваторияи миллии Тоҷикистон ба номи Талабхӯҷа Сатторов 44 нафар шаҳрвандони хориҷӣ, аз ҷумла 42 нафар аз Ҷумҳурии Узбекистон, 1 нафар аз Кореяи Ҷанубӣ ва 1 нафар аз Ҷумҳурии Мардумии Чин таҳсил менамоянд. Чунин иттилоъ дод имрӯз зимни нишасти матбуотӣ ректори консерватория Баҳодур Давлатзода.

Иброз гардид, ки дар ин давра бо якчанд муассисаҳои давлатҳои хориҷӣ шартномаҳои ҳамкорӣ ба имзо расиданд. Аз ҷумла, байни Консерваторияи миллии Тоҷикистон ба номи Талабхӯҷа Сатторов ва Донишкадаи давлатии санъати Қафқози Шимолӣ ва бо Консерваторияи миллии Озарбойҷон Созишномаи ҳамкорӣ ба имзо расид.

Иттилоъ дода шуд, ки дар ин давра донишҷӯёни Консерватория дар озмунҳои байналмилалӣ низ фаъолона иштирок намуданд. Гурӯҳи навозандагони созҳои халқии донишҷӯёни Консерваторияи миллии Тоҷикистон дар озмуни байналмилалӣ бахшида ба эҷодиёти Ҳунарпешаи халқии Узбекистон Абдуҳошим Исмоилов дар шаҳри Фарғонаи Ҷумҳурии Узбекистон иштирок намуда, сазовори ҷойи якум гардид.

Донишҷӯи курси дуюми ихтисоси фортепианои тахассусӣ Меҳрона Маҷидова дар Онлайн-озмуни 5-уми байналмилалии санъати фортепианонавозӣ дар шаҳри Қазони Федератсияи Русия иштирок намуда, сазовори дипломи дараҷаи сеюм гардид.

Инчунин дар Консерватория Озмуни 13-уми дохилии «Иҷрокунандаи беҳтарин» аз рӯйи ҳашт номинатсия бахшида ба 35 – солагии Истиқлоли давлатии Ҷумҳурии Тоҷикистон баргузор гардид. Дар озмун зиёда аз 45 донишҷӯ иштирок намуда, 23 нафар соҳиби ҷойи намоён гардид.

Зарангези ЛАТИФ,
АМИТ «Ховар»

АКС: Консерваторияи миллии Тоҷикистон ба номи Талабхӯҷа Сатторов