Дар ноҳияи Рӯдакӣ оид ба нақши Наврӯз дар ташаккули худшиносии миллӣ конференсияи илмӣ доир шуд

ДУШАНБЕ, 05.04.2026 /АМИТ «Ховар»/. Дар Коллеҷи техникию омӯзгории ноҳияи Рӯдакӣ таҳти унвони «Наврӯз — рамзи худшиносии миллӣ ва ҷашни баҳамоии тамаддунҳо» конференсияи илмӣ-назариявӣ баргузор гардид, хабар доданд ба АМИТ «Ховар» аз Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон.

Дар конференсия Раиси Кумита оид ба таҳсилоти ибтидоӣ ва миёнаи касбӣ Фарҳод Раҳимӣ оид ба таърих, ҳикмат, анъана, фарҳанг ва ҷаҳонишавии Наврӯз ибрози назар намуда, нақши муассисаҳои таълимиро дар тарбияи насли ҷавон ва густариши фарҳанги миллӣ баланд арзёбӣ намуд.

Дар маърузаҳои  иштирокдорон диққати асосӣ ба ҷойгоҳ ва нақши Наврӯз дар ташаккули худшиносии миллӣ, рушди арзишҳои фарҳангӣ ва густариши ҳамкории тамаддунҳо дода шуд. Гуфта шуд, ки Наврӯз на танҳо ҷашни миллӣ, балки омил ва василаи пайванди фарҳангҳои гуногун ва густариши ҳамдигарфаҳмӣ байни халқҳо мебошад.

Иброз гардид, ки чунин конференсияҳо барои ҷавонон имкони омӯзиши арзишҳои миллӣ ва васеъ кардани доираи донишҳои илмӣ ва фарҳангиро фароҳам меоранд. Эҳёи суннатҳои миллӣ ва анъанаҳои Наврӯз барои тақвияти ҳисси ватандӯстӣ ва худшиносии ҷавонон нақши муҳим мебозад.

Иштирокчиён дар қисмати музокираи конференсия фикру мулоҳизаҳояшонро оид ба ҳифзи арзишҳои фарҳангӣ, тарғиби анъанаҳои миллӣ ва баланд бардоштани сатҳи маърифати ҷавонон баён намуданд.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон