Сардори Хадамоти зиддиинҳисорӣ: шаҳрвандон метавонанд барои ҳалли мушкилот ба телефони боварӣ занг зананд

ДУШАНБЕ, 17.07.2019. /АМИТ «Ховар»/. 17 июл дар Хадамоти зиддиинҳисории назди Ҳукумати Ҷумҳурии Тоҷикистон бо иштироки доираи васеи хабарнигорони ватанию хориҷӣ доир ба ҷамъбасти фаъолияти шашмоҳаи ин ниҳод нишасти матбуотӣ доир гардид. Ҷамъомадро Сардори Хадамоти зиддиинҳисорӣ Икромиддин Вализода ифтитоҳ намуда, ба таври мухтасар аз дастовардҳои хадамот дар роҳи татбиқи ҳидояту супоришҳои Пешвои миллат муҳтарам Эмомалӣ Раҳмон, қарорҳои Ҳукумати Ҷумҳурии Тоҷикистон, татбиқи қонунгузории зиддиинҳисорӣ, мушкилоти мавҷуда ва нақшаҳои минбаъда маълумот дод.

Икромиддин Вализода ва дигар масъулини хадамот ба саволҳои хабарнигорон, аз ҷумла доир ба баланд шудани нархи обу гармӣ, вазъи бозори сӯзишворӣ, маҳсулоти ниёзи аввалин, хизматрасонии терминалҳои пардохтӣ, ҳалли мушкилоти шаҳрвандоне, ки ба Хадамоти зиддиинҳисорӣ тавассути телефони боварӣ, марказҳои машваратӣ ва сомонаи ниҳод муроҷиат намудаанд, инчунин масъалаи нархи хизматрасонии муассисаҳои таълимӣ ҷавобҳои мушаххас гардонданд.

Рақами телефони боварии Хадамоти зиддиинҳисорӣ 236-50-27 аст, ки шаҳрвандон метавонанд пайваста ба он занг зананд.