Вазорати мудофиа: маъракаи даъвати тирамоҳии ҷавонон ба сафи Қувваҳои мусаллаҳ 90% иҷро гардид

ДУШАНБЕ, 14.11.2019 /АМИТ «Ховар»/. Дар Тоҷикистон маъракаи  даъвати тирамоҳии ҷавонон ба сафи Қувваҳои мусаллаҳ 90%  иҷро гардид.

Комиссариати ҳарбии Вилояти Мухтори Кӯҳистони Бадахшон аз ҳама пешсаф буда, нақшаи даъватро 110% ва пойтахти мамлакат — шаҳри Душанбе низ 110% иҷро намуданд. Тавре ба мухбири АМИТ «Ховар» сардори маркази матбуоти Вазорати мудофиаи Ҷумҳурии Тоҷикистон Ориф Нозимиён иттилоъ дод, дар вилояти Суғд ва шаҳру ноҳияҳои тобеи ҷумҳурӣ маъракаи даъвати тирамоҳии ҷавонон ба сафи Қувваҳои мусаллаҳ 90% иҷро шуд. Ин нишондиҳанда дар вилояти Хатлон 89%-ро ташкил медиҳад.

Сардори маркази матбуоти Вазорати мудофиаи Ҷумҳурии Тоҷикистон зикр намуд, ки даъватшавандагон пас аз 2 моҳ савганди ҳарбӣ ёд мекунанд ва ҳоло онҳо аз курсҳои махсус гузашта истодаанд.

Ёдовар мешавем, ки даъвати тирамоҳии ҷавонон ба сафи Қувваҳои мусаллаҳ дар Тоҷикистон 1 октябр оғоз гардида, 30 ноябр ба анҷом мерасад.