COVID-19. Дар Душанбе Беморхонаи сайёри муваққатӣ барои қабули беморон пурра омода карда шуд

Май 25, 2020 06:50

ДУШАНБЕ, 25.05.2020 /АМИТ «Ховар»/. Тавре  қаблан иттилоъ дода будем, бо назардошти вазъи мавҷуда  Раиси шаҳри Душанбе Рустами Эмомалӣ ба Раёсати тандурустӣ ва дигар сохторҳои дахлдори шаҳр дастур дода буд, ки  ба таври илова чанд беморхонаи  муваққатӣ барои зиёда аз 3000 (се ҳазор) кат  ҷиҳати табобати  гирифторони  COVID-19 бо фароҳам овардани ҳама шароити муосир, алахусус бо ҷалби мутахассисони баландихтисос ва таъмин намудани таҷҳизоти тиббии сифаташон баланд ва дорувории зарурӣ ташкил карда шаванд.

Бо ин мақсад дар варзишгоҳи «Бафанда»-и шаҳри Душанбе Беморхонаи сайёри муваққатӣ бо тамоми шароити мавҷуда ташкил карда шуд.

Тавре дар суҳбат бо хабарнигори АМИТ «Ховар» сардухтури беморхонаи муваққатӣ Маҳмадулло Қосимов зикр намуд, ин беморхона дар масоҳати 2 гектар ташкил шуда, дар он 144 контейнерҳои махсуси тиббӣ ҷойгир карда шудаанд, ки дорои  984 кати  хоб мебошад.

«Ҳар як контейнерҳои махсуси тиббӣ 20 ва 40-фута буда, контейнерҳои истиқоматии 20-фута 106 адад, дорои 848 кат ва контейнерҳои 40-фута 34 адад, дорои 136 кати хоб  мебошанд. Дар ҳар контейнер аз 4 то 8 кати хоб мавҷуд мебошанд. Ду контейнери дигар барои анбор ва нуқтаи тиббӣ пешбинӣ шудаанд»,- гуфт Маҳмадулло Қосимов.

Бино ба ибрози номбурда, ҳар контейнер мисли  ҳуҷраи хурд буда, дар он барои табобат ва зист шароити зарурӣ мавҷуд аст. Дохили ҳар контейнер  бо рахти хоб, телевизор, мизу курсӣ, кондисионер, обгармкунаки барқӣ (термекс), ташноб, дастшӯяк ва кабинаи душ таҷҳизонида шудааст. Ҳамчунин тамоми  доруворӣ, маводи тиббии муҳофизатӣ ва дигар лавозимоте, ки барои табибон ва ҳамшираҳои шафқат заруранд, пурра таъмин карда шудааст. Корҳои пайвасткунӣ дар самти барқ ва об пурра ба итмом расонида шуда, ҷойи партовгоҳ ва ҷомашӯӣ низ омода мебошад.

Беморхонаи сайёри муваққатӣ дар доираи талошҳои бевоситаи  Пешвои миллат муҳтарам Эмомалӣ Раҳмон ва Раиси шаҳри Душанбе муҳтарам Рустами Эмомалӣ ҷиҳати баланд бардоштани сатҳу сифати хизматрасонии тиббӣ ба аҳолӣ ва  пешгирию ва табобати бемории COVID-19 равона карда шудааст.

«Дар ҷавоб ба ин  ғамхории роҳбарияти мамлакат ва пойтахт мо табибонро зарур меояд, ки  шабу рӯз аз имкониятҳои мавҷуда истифода бурда, барои пешгирии сирояти бемории COVID-19 кӯшиш намоем», — мегӯяд сардухтури беморхонаи муваққатӣ.

«Ҳоло беморхонаи сайёр барои ба фаъолият оғоз намудан пурра омода буда, дар назар аст, ки ин марказ ҳамчун минтақаи карантинӣ шаҳрвандонро ба карантин фаро гирад. Бо сабаби он ки ҳоло дар бемористонҳое, ки барои пешгирӣ ва табобати коронавирус пешбинӣ шудаанд, ҷойҳои холӣ зиёданд, аз ин рӯ ин марказ ҳамчун табобатгоҳи  эҳтиётӣ омода карда шудааст. Агар  аз тарафи Ҳукумати мамлакат ва Вазорати тандурустӣ ва ҳифзи иҷтимоии аҳолӣ барои фаъолият намудан иҷозат дода шавад, мо дарҳол корро оғоз мекунем»,- зикр намуд Маҳмадулло Қосимов.

Хотиррасон мешавем, ки ҳоло вазъи эпидемиологӣ тадриҷан хуб гардида, теъдоди беморон дар Тоҷикистон, хушбахтона, рӯз аз рӯз коҳиш меёбад.

 

Холисаи АСОМИДДИН,
Тоҳир САИД,
АМИТ «Ховар»

   

Май 25, 2020 06:50

Хабарҳои дигари ин бахш

Бо ташаббуси Раиси шаҳри Душанбе Рустами Эмомалӣ ба муассисаҳои тандурустии пойтахт лавозимоту таҷҳизоти нави тиббӣ дастрас гардид
ОБ ЗАХИРА КУНЕД! Дар баъзе маҳаллаҳои ноҳияи Синои шаҳри Душанбе интиқоли оби нӯшокӣ ба муҳлати як шабонарӯз қатъ мегардад
Раиси шаҳри Душанбе Рустами Эмомалӣ дар мақомоти иҷроияи ҳокимияти давлатии пойтахт ва ноҳияҳои он як қатор тағйироти кадрӣ ба амал овард
ЯК СОЛ МУҲЛАТ. Вокуниши Раиси шаҳри Душанбе Рустами Эмомалӣ ба муроҷиатномаи саҳмдорони бинои сохтмонаш нотамом дар кӯчаи А. Ғуломов
Дар шаҳри Душанбе корҳои фаҳмондадиҳӣ дар самти риояи гигиенаи шахсӣ ва истифодаи ҳатмии ниқоб вусъат дода мешаванд
Қарори Раиси шаҳри Душанбе дар бораи даъвати навбатии тирамоҳии шаҳрвандон ба хизмати ҳарбӣ ба тасвиб расид
Масъалаҳои вобаста ба сирояти коронавируси COVID-19 дар ҷаласаи назди Раиси шаҳри Душанбе Рустами Эмомалӣ баррасӣ гардиданд
Раиси шаҳри Душанбе Рустами Эмомалӣ бо ҷараёни корҳои сохтмонӣ дар иншооти ҷашнии соҳаи маорифи пойтахт шинос шуданд
Гурӯҳҳои ташвиқотӣ вобаста ба пешгирӣ аз паҳншавии сирояти COVID-19 дар Душанбе корҳои таблиғотӣ-фаҳмондадиҳӣ мегузаронанд
COVID-19. Рӯзҳои санитарӣ дар як қатор муассисаҳои хизматрасонии шаҳри Душанбе то 15 июн тамдид карда шуданд
ДАСТИ ДӮСТ. Бо ибтикори бевоситаи Раиси шаҳри Душанбе Рустами Эмомалӣ ширкати ӯзбекистонӣ ба Тоҷикистон доруворӣ кумак намуд
ТАБИБОНИ ЧИН БА КУМАК ОМАДАНД! Бо ибтикори Раиси шаҳри Душанбе Рустами Эмомалӣ ҳавопаймо аз Чин бо мутахассисон ва кумаки хайрия дар пойтахти Тоҷикистон фуруд омад