Шореҳи адабии АМИТ «Ховар» Мансур Суруш аз ҷониби портали «Proza.ru» номзад ба ҷоизаи миллии адабии «Адиби сол» пешбарӣ шуд

Ноябрь 19, 2020 13:07

ДУШАНБЕ, 19.11.2020 /АМИТ «Ховар»/. Нависанда, драматург, тарҷумон ва публисист, дорандаи Ҷоизаи Иттифоқи нависандагони Тоҷикистон ба номи С.Айнӣ ва Иттифоқи журналистони Ҷумҳурии Тоҷикистон ба номи А. Лоҳутӣ, узви раёсати Иттифоқи нависандагон, шореҳи адабии АМИТ «Ховар» Мансур Суруш аз ҷониби комиссияи таҳририяи портали «Proza.ru» номзад ба ҷоизаи миллии адабии «Адиби сол» барои соли 2020  пешбарӣ карда шуд.

Ба иттилои коршиноси кумитаи таҳририяи ҷоизаи «Адиби сол» Наталя Иванова, Мансур Суруш ҳаққи иштирок барои дарёфти  ҷоизаи «Адиби сол» ва нашри асарҳо дар маҷмӯаи дастаҷамъӣ, ки аз ҷониби ҳакамон арзёбӣ мешавад, пайдо намуд. Дипломи номзад ба нависанда пас аз нашри асарҳояш ҳамроҳ бо нусхаҳои муаллифии маҷмӯаи дастаҷамъӣ дар дафтари Иттифоқи нависандагони Россия ё тавассути почта супорида мешавад.

Бояд зикр намуд, ки озмун барои ҷоизаи «Адиби сол» аз рӯи номинатсияи асосии «Адиби сол» инчунин дар номинатсияҳои иловагии «Дебют», «Фантастика», «Адабиёти бачагона», «Ҳаҷв», «Драматургия» баргузор мешавад.

Дар ҳар номинатсия 3 нафар лауреатҳо интихоб карда мешаванд. Барандагони ҳамаи номинатсияҳо бо муҷассамаҳои кӯчак дар шакли қалам мукофонида шуда, имкони нашри китоби шахсии худро аз ҳисоби кумитаи тадорукот пайдо мекунанд.

Соли 2020 аз ҷониби Иттифоқи нависандагони Россия Соли Бунин эълон карда шудааст. Ҳама номзадҳо ба ҷоизаи «Адиби сол» барои соли 2020, ки асарҳояшон дар маҷмӯаи дастаҷамъии озмун ба табъ мерасанд ва аз ҷониби ҳакамон баҳои мусбат мегиранд, бо медали ҷашнии бахшида ба 150-солагии нависандаи рус, барандаи ҷоизаи Нобел Иван Бунин мукофотонида мешаванд. Фармони Президиуми Иттифоқи нависандагони Россия дар бораи супурдани медали Бунин пас аз интишори маҷмӯаи дастаҷамъии озмун бо асарҳо ва баҳои он аз ҷониби ҳакамон ба имзо хоҳад расид.

МАЪЛУМОТНОМАИ АМИТ «ХОВАР»:

Мансур Суруш муаллифи маҷмӯаи ҳикояҳо, повестҳо ва ҳикояҳо, аз қабили «Намози бомдодӣ», «Замон ва андеша», «Паҳнои хотира», «Гуноҳи деворбаст», романи «Чала» ва ғайра мебошад. Намоишномаҳои  ӯ «Акси садои тӯлонӣ», «Ба куштани ман ҳанӯз вақт меёбед», «Шиквае аз ту надорам, асри ман», «Халифа – Лаклак», «Ях ва оташ» дар театрҳои русӣ-драмавии ба номи В. Маяковский  (Душанбе) ва ба номи А. С. Пушкин (Хуҷанд), инчунин Театри ӯзбекии ҷумҳуриявии ба номи Ш. Бурҳонов  ба саҳна гузошта шудаанд. Муаллифи сенарияи филми ҳуҷҷатии  «Аз Душанбе то Тел-Авив» мебошад.

Ӯ асарҳои як зумра нависандагони тоҷикро, аз ҷумла порчаҳо аз китоби «Ҷомеъ-ул-ҳикоёт» -и Муҳаммад Авфии Бухорӣ, маҷмӯаи ҳикояҳои Урун Кӯҳзод «Рӯзбеҳ», ҳикояҳои ҷудогонаи Абдумалик Баҳорӣ, песаҳои С.Улуғзода — «Гавҳари шабчироғ», Низом Қосим — «Куруш ва Куруз», бобҳо аз романи Саттор Турсун «Завол», мақолаи маъруфи устод С.Айнӣ «Конститутсияи сталинӣ ва яҳудиёни меҳнаткаш» ба забони русӣ тарҷума кардааст. Тарҷумаи китоби андешаҳои Президенти Ҷумҳурии Тоҷикистон Эмомалӣ Раҳмон дар бораи қисмати таърихии халқи тоҷик таҳти унвони «Тоҷикон дар оинаи таърих. Аз ориён то сомониён» дар эҷодиёти Суруш мавқеи хос дорад.

Дар ҳаммуаллифӣ бо доктори илмҳои фалсафа С.Фаттоҳзода чеҳраи сиёсии Қаҳрамони Тоҷикистон Эмомалӣ Раҳмонро ба қалам кашидааст, ки нақш ва саҳми Пешвои миллатро дар ташаккули давлати воқеии мустақил ва демократии тоҷикон дар марзи ду аср инъикос мекунад.

Баъзе ҳикояҳо ва мақолаҳои Мансур Суруш дар маҷаллаҳои «Наш современник», «Огонёк», «Родина» (Москва), «Русское поле» (Кишинёв) ва маҷмӯаҳои дастаҷамъӣ, ки дар дар Минск ва Ереван нашр шудаанд, рӯи чопро дидаанд.

«Барои зистан ҳамзистӣ мебояд” — маҳз ҳамин ғоя, дар замони пурталотуми мо дӯстона зистанро дар асари нави ӯ  “Ях ва оташ” талқин мекунад.

Ноябрь 19, 2020 13:07

Хабарҳои дигари ин бахш

Дар Академияи идоракунии давлатӣ маркази омӯзишӣ ва магистратураи «Мактаби давлатдории Эмомалӣ Раҳмон» ифтитоҳ ёфт
Дар Бадахшон 36 нафар иштирокчиёни даври вилоятии озмуни «Тоҷикистон- Ватани азизи ман» ба даври ҷумҳуриявӣ роҳхат гирифтанд
Дар Тоҷикистон Анҷумани 6-уми омӯзгорони ИДМ баргузор мешавад
МАРКАЗИ МИЛЛИИ ТЕСТӢ: Аз 11 то 14 август азнавбақайдгирӣ барои иштирок дар озмуни тақсимоти такрорӣ баргузор мешавад
Даври ниҳоии Фестивал-озмуни ҷумҳуриявии «Андалеб-2021» дар Душанбе доир мегардад
ТИКА ба Радиои «ҒМ–Ховар» таҷҳизоти муосир тақдим мекунад
Коршиносони Кумитаи забон ва истилоҳот 61 ҳазору 500 истилоҳро мавриди баррасӣ ва мувофиқа қарор доданд
«ЗИ ҶӮЕ, КИ ХУРДӢ АЗ ОН ОБИ ПОК…». Экожурналистҳо соҳили дарёи Варзобро аз партовҳо тоза намуданд
Донишгоҳи техникии Тоҷикистон мавқеи худро дар рейтинги ҷаҳонӣ 3 734 зина боло бурд
Дар Хатлон даври дуюми Озмуни ҷумҳуриявии «Тоҷикистон-Ватани азизи ман» оғоз ёфт
ИҶЛОСИЯИ 44-УМИ КУМИТАИ МЕРОСИ ҶАҲОНИИ ЮНЕСКО ИДОМА ДОРАД. 16 иншооти Тоҷикистон чун номзад барои шомилшавӣ ба Феҳристи мероси ҷаҳонии ЮНЕСКО пешниҳод шудаанд
Хонандаи тоҷик дар Олимпиадаи ҷаҳонӣ аз фанни биология (IBO-2021) соҳиби медали биринҷӣ гардид

Маводҳои таҳлилӣ