Раванди татбиқи лоиҳаи «Рушди устувор» дар меҳвари мулоқоти Баҳодур Шерализода ва Филипп Марсийон қарор гирифт

ДУШАНБЕ, 28.04.2021 /АМИТ «Ховар»/. Раванди татбиқи лоиҳаи «Рушди устувор», ки соли 2019 оғоз ёфтааст, дар мулоқоти Раиси Кумитаи ҳифзи муҳити зисти назди Ҳукумати ҷумҳурӣ Баҳодур Шерализода  ва роҳбари ширкати фаронсавии «Шивер Тоҷикистон» Филипп Марсийон баррасӣ гардид.

Кумитаи ҳифзи  муҳити зисти назди Ҳукумати  ҷумҳурӣ иттилоъ медиҳад, ки мақсади лоиҳаи «Рушди устувор» ташаккули фарҳанги экологии муштариён, кормандон, идоракунии партовҳо, сарфаи энергия ва об, кор бо маводи бастабандӣ, кам кардани истифодаи маҳсулоти пластикӣ, хусусан халтаҳои полиэтиленӣ мебошад.

Раиси Кумитаи ҳифзи муҳити зист Баҳодур Шерализода доир  ба корҳои анҷомдодашуда дар доираи лоиҳа ибрози назар намуда, таваҷҷуҳи намояндагони ширкати фаронсавии «Шивер Тоҷикистон» -ро ба татбиқи минбаъдаи чорабиниҳое, ки дар доираи лоиҳа ба нақша гирифта шудаанд, ҷалб намуд ва омодагии худро барои ҳамкории   минбаъда  иброз дошт.

Вохӯрӣ дар фазои якдигарфаҳмӣ сурат гирифта, мусоҳибон вобаста ба масъалаҳои баррасишуда ба  мувофиқа расиданд.

АКС аз Кумитаи ҳифзи муҳити зист