«АҲМАДШОҲИ МАСЪУД МИҚДОРИ ХОКЕ НЕ, БАЛКИ МАКТАБИ БУЗУРГИ ТАФАККУРИ ИНСОНИСТ!». Дар Душанбе маросими ёдбуди шаҳиди роҳи озодию сулҳи Афғонистон доир шуд

Сентябрь 10, 2021 14:15

ДУШАНБЕ, 10.09.2021 /АМИТ «Ховар»/.  Имрӯз дар Сафорати Афғонистон дар Душанбе маросими ёдбуд ва бистумин солрӯзи  шаҳодати  Қаҳрамони миллии Афғонистон, шаҳид Аҳмадшоҳи Масъуд  доир гардид, хабар медиҳад хабарнигори АМИТ «Ховар».

Дар маросими ёдбуди Аҳмадшоҳи Масъуд аҳли илму фарҳанг, сиёсатшиносон ва шахсиятҳои шинохтаи ду давлат- Тоҷикистон ва Афғонистон, инчунин намояндагони воситаҳои ахбори омма  ҳузур доштанд.

Нахуст  суруди миллии Афғонистон садо дод. Сипас Сафири Фавқулода ва Мухтори Ҷумҳурии Исломии Афғонистон Муҳаммад Зоҳир Ағбар ба арвоҳи поки шаҳид Аҳмадшоҳи Масъуд санову дуруд фиристод.  Ҳамзамон мавсуф ба Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои пос доштани хотири шаҳид Аҳмадшоҳи Масъуд арзи сипос кард ва гуфт, ки воқеан дар рӯзи сахтӣ дӯстро аз душман метавон ҷудо кард.

Муҳаммадзоҳир Ағбар доир ба корнамоии ин шахсияти барҷастаи сиёсии Афғонистон сухан карда, нақши онро  дар ҳифз ва ҳимояи хоки Афғонистон аз неруҳои бегонаю ҳузури онҳо ва таъмини сулҳу ваҳдат махсус зикр карда, бо таассуф гуфт, ки имрӯз толибон санги мақбараи пурифтихори Қаҳрамони миллиро беҷо карданду ба хокаш даст заданд.

“Бояд бидонанд, ки Масъуд миқдори хоке нест, балки  ӯ як мактаби фикр, мактаби тафаккури инсонист, ки рӯҳаш ҳамешагӣ ба ифтихору номуси баланди ватандорӣ ва ҳифзи меҳан аз ғосибон даъват мекунад”,-гуфт  ӯ ва афзуд:

Санги бадгавҳар агар косаи заррин шиканад,

Қимати санг наяфзояду зар кам нашавад.

Дар маҳфил ҳамзамон шахсиятҳои дигар низ ибрози назар карда, зикр сохтанд, ки  Аҳмадшоҳи Масъуд барои озодӣ ба по хест ва то поёни умр ба сари паймоне, ки баста буд, истод ва дар ин роҳ ҷон супурд. Ў инсони ҷасур, парҳезгор, шуҷоъ, мутаққӣ ва ғайривобаста буду ишқи ӯ ба сарзамини Афғонистон ва вобастагиаш ба мардумаш буд.

Дар маросим солрӯзи марги шаҳид Аҳмадшоҳи Масъуд ба хонаводаву ҳамсангарон ва ёрону дӯстонаш таслият гуфта шуд. Иброз гардид, ки 20 сол сипарӣ шуд, аммо роҳ, андеша ва тафаккури ин абармард ҳамчунон ҷовидона аст.

Аҳамадшоҳи Масъуд дар деҳаи тоҷикнишини Ҷангалаки вилояти Панҷшер, воқеъ дар шимоли шаҳри Кобул, дар оилаи полковники полис Шоҳӣ Дӯст Муҳаммадхон таваллуд шуда, дар дабистони Истиқлол сабақ омӯхтааст. Соли 1970 — дар 17-солагӣ Аҳмадшоҳ ба худ тахаллуси Масъуд («хушбахт»)-ро гирифт. Соли 1973 ба Донишгоҳи политехникии шаҳри Кобул (факултаи сохтмон ва архитектурӣ) дохил шуд, вале баъд аз ислоҳоти Шоҳ Довуд (1973) ба вилояти Пешовари Покистон муҳоҷир шуд. Дар онҷо ба ҳаракати мухолифини исломӣ, ки Бурҳонуддин Раббонӣ сарварӣ мекард, ҳамроҳ шуд.

Соли 1975 дар шӯриши бебарори Панҷшер бар зидди диктатураи Довуд иштирок намуд. Иштирокдори ҷанги солҳои 1979-1989 дар  Афғонистон аст. Бар зидди ӯ артиши Иттиҳоди Шӯравӣ  9 маротиба амалиёти ҷангӣ гузаронид, аммо ягон маротиба муваффақ нашуд. Аҳмадшоҳи Масъуд соли 1988 духтари ёрдамчии наздики худро ба занӣ гирифта, соҳиби 6 фарзанд шуд, ки 5-тоаш духтар ва яке писар- Аҳмад Масъуд  аст.

Ӯ ягона сарлашкари муҷоҳидин мебошад, ки соли 1982 бо сипоҳиёни Иттиҳоди Шӯравӣ созишномаи сулҳ бастааст. Бо ҳамроҳии Раббонӣ ба Ҳизби ҷамъияти исломии Афғонистон сарварӣ кардааст. Дар аввалҳои соли 1990 барои сохтани давлати алоҳидаи зиддипаштунӣ бо сарварии тоҷикон дар шимоли Афғонистон баромад кардааст.

Баъд аз хуруҷи аскарони шӯравӣ аз хоки Афғонистон соли 1989 дар шимолу шарқи Афғонистон давлати алоҳидае бо номи “Масъудистон” ташкил кард, ки аз ҷумла маҳалҳои Парвон, Тахор, Бағлон, Бадахшон ва ғайраро фаро мегирифт.

Масъуд  9 сентябри соли 2001 дар вақти мусоҳиба тарконда шуд. Террористони худкуш худро рӯзноманигор хонда, дар камера маводи тарканда пинҳон кардаанд, ки бо он ӯро тарконданд.

Зиндагии  Аҳмадшоҳи Масъуд 10 сентябри соли 2001 ба охир расид. Вай 48 -сола буд ва то он замон аллакай чун қаҳрамони Афғонистон шинохта шуда буд.

 София ШОИК,
Тоҳирҷон САИД,
АМИТ “Ховар”

Сентябрь 10, 2021 14:15

Хабарҳои дигари ин бахш

Эмомалӣ Раҳмон: «Масъалаи талафоти неруи барқ ва истифодаи ғайриқонунии он дар ҷумҳурӣ ташвишовар аст»
АГЕНТИИ НАЗОРАТИ ЭНЕРГЕТИКӢ ТАЪСИС ДОДА ШУД. Дар қонунгузории Тоҷикистон барои истифодаи ғайриқонунии неруи барқ ҷавобгарии ҷиноятӣ пешбинӣ гардид
Дар маҷаллаи «The Diplomatic Insight» мақолаи олимони тоҷик таҳти унвони «Эмомалӣ Раҳмон – Пешвои дипломатияи байналмилалӣ» ба нашр расид
Сарвазири Тоҷикистон бо рафти корҳои бартарафсозии оқибатҳои офати табиӣ дар ноҳияи Тоҷикобод шинос шуд
Президенти Тоҷикистон Эмомалӣ Раҳмон: «Пиряхҳои мо танҳо манбаи об барои минтақа набуда, дар ҳифзи иқлими минтақа низ нақши муҳим мебозанд»
Пиряхҳои Тоҷикистон боигарии бебаҳои табиӣ ва сарчашмаҳои муҳими оби тоза дар Осиёи Марказӣ мебошанд
ҶОИЗАИ «ШАҲРИ СУЛҲ». Онро Душанбе барои саҳми беандоза дар таҳкими сулҳ ва арзишҳои башарӣ бо қарори ЮНЕСКО соҳиб гардид
Ба ифтихори 115-солагии Шоири халқии Тоҷикистон Боқӣ Раҳимзода дар Осорхонаи миллӣ намоиш ташкил мешавад
МАСЪУЛИЯТИ ШАҲРВАНДӢ. Барои ғайриқонунӣ истифода бурдани неруи барқ ҷавобгарии ҷиноятӣ муқаррар гардид
Президенти Комиссияи Иттиҳоди Аврупо Урсула фон дер Ляйен аз иқтидори бузурги Неругоҳи азими барқи обии «Роғун»-и Тоҷикистон ёдовар шуд
Президенти Тоҷикистон тавсеаи ҳамкории давлатҳои Осиёи Марказиро бо Иттиҳоди Аврупо дар соҳаи энергетикаи «сабз» аз самтҳои ояндадор номиданд
Эмомалӣ Раҳмон: «Пиряхҳои Тоҷикистон танҳо манбаи об барои минтақа набуда, дар нигоҳдории иқлими минтақа низ нақши муҳим мебозанд»