Дипломатҳои тоҷику рус ҳамроҳ бо ҳамтоёнашон аз кишварҳои дигари ИДМ дар Вашингтон дар Рӯзи сарбози номаълум гулчанбар гузоштанд

ДУШАНБЕ, 06.12.2021 /АМИТ «Ховар»/. Дипломатҳои тоҷику рус дар Амрико ҳамроҳ бо ҳамтоёни худ аз кишварҳои дигари ИДМ рӯзи ҷумъа, 3 декабр дар Рӯзи сарбози номаълум маросими ёдбуд баргузор карда, дар назди девори «Рӯҳи Элба» — Ёдгории Ҷанги дуюми ҷаҳонӣ, ки дар маркази пойтахти Амрико воқеъ аст, гулчанбарҳо гузоштанд. Тавре АМИТ «Ховар» иттилоъ медиҳад, дар ин бора ТАСС хабар додааст.

«Имрӯз дар ин ҷо, дар назди ёдгории <…> Ҷанги дуюми ҷаҳонӣ намояндагони давлатҳои ИДМ ба хотири поси эҳтиром ҷамъ омаданд. Охир, он солҳо касе нигоҳ намекард, ки ту қазоқӣ ё украин, беларусӣ ё  қирғиз, мо ҳама барои пирӯз омадан дар он ҷанги ваҳшиёна муттаҳид будем ва мо ғалаба кардем», — гуфт сафири Русия дар ИМА Анатолий Антонов.

Вай гуфт, ки боқимондаҳои ҷасади беш аз 2 миллион нафар сарбозони шӯравӣ, ки дар Ҷанги дуюми ҷаҳонӣ кушта шудаанд, то ҳол пайдо нашудаанд. Сафири Русия таъкид кард, ки «то даме, ки мо ин афродро дар ёд дорем, то он дам онҳо дар қалби мо зиндагӣ хоҳанд кард».

Дар маросими ёдбуд намояндагони сафоратхонаҳои Озарбойҷон, Арманистон, Беларус, Қазоқистон, Қирғизистон, Русия, Тоҷикистон, Туркманистон ва Узбекистон ширкат доштанд.

Дар Русия Рӯзи сарбози номаълум санаи фаромӯшношуданист ва он 3 декабр ба поси хотири сарбозони рус ва шӯравие, ки дар амалиёти ҷангӣ дар қаламрави кишвар ва хориҷи он кушта шудаанд, таҷлил мешавад. Санаи хотирмон бо фармони президенти Русия моҳи ноябри соли 2014 тасдиқ шудааст. 3 декабр ба далели он интихоб шудааст, ки дар ин рӯзи соли 1966 ба муносибати 25-умин солгарди шикасти неруҳои немис дар назди Москва хокистари як сарбози ношинос дар назди деворҳои Кремли Москва дар Боғи Александр ба хок супурда шуд.

                                      АКС: © Владислав Павлов / ТАСС