Дар ноҳияи Ҷаббор Расулов маъракаи «Тозагии маҳал» ва ниҳолшинонӣ доир гардид

ДУШАНБЕ, 06.02.2022 /АМИТ «Ховар»/. Зимни  гузаронидани маъракаи «Тозагии маҳал» дар Ҷамоати деҳоти Ғӯлакандози ноҳияи Ҷаббор Расулов ҳудуд ва минтақаҳои аҳолинишин аз партовҳои гуногун тоза гардида, ду тонна партов бароварда шуд. АМИТ «Ховар»  бо истинод ба Кумитаи ҳифзи муҳити зисти назди Ҳукумати ҷумҳурӣ иттилоъ медиҳад, ки маъракаи  «Тозагии маҳал» бо мақсади тозаву обод намудани муҳити атроф ва беҳтар намудани вазъи экологӣ бо ташаббуси бахши ҳифзи муҳити зисти ноҳияи Ҷаббор Расулов гузаронида шуд.

Дар он беш аз 80 нафар омӯзгорон ва хонандагони муассисаи таълимии миёнаи умумии № 5 фаъолона иштирок намуда, дар корҳои ободонӣ  ва тоза намудани  муҳити атроф саҳми муносиб гузоштанд.

Ҳамчунин дар ҷамоати шаҳраки Меҳробод ва кӯчаи Абӯалӣ ибни Синои ноҳия бо иштироки кормандони бахши ҳифзи муҳити зист бо мақсади обод ва сабзазоркунӣ қад-қади роҳи нақлиётгард 150 бех ниҳолҳои дарахтони ҳамешасабз, аз ҷумла санавбар шинонида шуданд.

 АКС: Кумитаи ҳифзи муҳити зисти нази Ҳукумати ҷумҳурӣ