«БАРОИ ДАВЛАТУ МИЛЛАТАМ СОДИҚОНА ХИЗМАТ МЕКУНАМ!» Таҳти ин унвон дар Душанбе Фестивали дӯстии афсарону сарбозон доир карда мешавад
![](https://khovar.tj/wp-content/uploads/2023/02/tadorukot-sha-r.jpg)
ДУШАНБЕ, 17.02.2023. /АМИТ «Ховар»/. Аз 17 то 22 феврал дар шаҳри Душанбе бо қарори дахлдори Раиси шаҳри Душанбе муҳтарам Рустами Эмомалӣ Фестивали сеюми дӯстии афсарону сарбозони пойтахт таҳти унвони «Барои давлату миллатам содиқона хизмат мекунам!» бахшида ба 30-юмин солгарди таъсисёбии Қувваҳои Мусаллаҳи Ҷумҳурии Тоҷикистон баргузор карда мешавад, хабар доданд ба АМИТ «Ховар» дар шуъбаи иттилоотии дастгоҳи Раиси шаҳри Душанбе.
Вобаста ба баргузории фестивал дар Мақомоти иҷроияи ҳокимияти давлатии шаҳри Душанбе ҷаласаи Кумитаи тадорукот баргузор гардид. Дар он масъалаҳои омодагӣ ҷиҳати дар сатҳи баланди ташкилӣ баргузор намудани фестивали мазкур баррасӣ карда шуданд.
Инчунин дар ҷаласа доир ба масъалаҳои омодагии муташаккилона ба даъвати баҳории ҷавонон ба хизмати ҳарбӣ ҳисоботи раисони комиссияҳои даъват дар нохияҳои шаҳри Душанбе ва аъзои Комиссияи шаҳрии ҷавонон ба хизмати ҳарбӣ шунида шуд.
АКС: Шуъбаи иттилоотии дастгоҳи Раиси шаҳри Душанбе