Дар Гранд Слами Боку-2023 аз Тоҷикистон 7 варзишгар иштирок менамоянд

ДУШАНБЕ, 20.09.2023 /АМИТ «Ховар»/. Аз 22 то 24 сентябр дар шаҳри Бокуи Ҷумҳурии Озарбойҷон мусобиқаи навбатии «World Judo Tour» – Гранд Слами Боку-2023 оид ба гӯштини ҷудо баргузор мегардад, ки дар он дастаи мунтахаби Тоҷикистон оид ба гӯштини ҷудо дар ҳайати 7 варзишгар иштирок менамояд. Дар ин хусус шореҳи варзиши АМИТ «Ховар» хабар медиҳад.

Мусобиқаи навбатии «World Judo Tour» – Гранд Слами Боку-2023 оид ба гӯштини ҷудо бо иштироки 313 варзишгари беш аз 57 давлат доир мегардад. Ҷумҳурии Тоҷикистонро дар ин мусобиқа Муҳаммадсолеҳ Қувватов дар вазни то 60кг, Эмомалӣ Нуралӣ дар вазни то 66кг, Маҳмадшариф Наҷмиддинов дар вазни то 73кг, Шодмон Ризоев дар вазни то 81кг, Ҷаҳонгир Маҷидов дар вазни то 90кг ва Мансур Раҳмон ҳамроҳ бо Шакармамад Мирмамадов дар вазни +100кг муаррифӣ менамоянд.

Ёдовар мешавем, ки фонди умумии ҷоизаҳо 154 000 евроро ташкил медиҳад. Ғолибони ҷойи аввал дар ҳамаи 14 вазн 5000 евро, барандагони медали нуқра 3000 евро ва медали биринҷӣ 1500 евро ҷоизапулӣ дарёфт менамоянд.

АКС аз манбаъҳои боз