Дар Душанбе вобаста ба хатари хурофот ва ифротгароӣ ҳамоиш доир шуд

ДУШАНБЕ, 14.04.2024 /АМИТ «Ховар»/. Дар Донишкадаи давлатии санъати тасвирӣ ва дизайни Тоҷикистон дар мавзуи «Хатари хурофот ва ифротгароӣ ба арзишҳои миллӣ, бақои миллат, амният ва ояндаи давлатдории миллӣ» ҳамоиши сиёсӣ баргузор шуд, хабар доданд ба АМИТ «Ховар» дар ин донишкада.

Ҳамоиш дар ҳошияи мулоқоти Президенти Ҷумҳурии Тоҷикистон муҳтарам Эмомалӣ  Раҳмон бо фаъолон, намояндагони ҷомеа ва ходимони дини ҷумҳурӣ, ки 9 марти имсол дар шаҳри Душанбе баргузор шуда буд,  аз ҷониби ташкилоти ибтидоии ҳизбии «Дизайн» дар якҷоягӣ бо Кумитаи иҷроияи Ҳизби Халқии Демократии Тоҷикистон дар ноҳияи Шоҳмансур ташкил карда шуд.

Дар ҷамъомад иброз гардид, ки суханронии Президенти мамлакат муҳтарам Эмомалӣ Раҳмон зимни мулоқот бо фаъолон, намояндагони ҷомеа ва ходимони дини мамлакат яке аз муассиртарин суханрониҳои Пешвои миллат дар солҳои охир буда, фарогири мубрамтарин масъалаҳои имрӯзи ҷомеа мебошад, ки ягон қишри ҷомеаро бетараф намегузорад.

Раиси Кумитаи иҷроияи Ҳизби Халқии Демократии Тоҷикистон дар ноҳияи Шоҳмансур ва директори Маркази тарғиби адабиёт ва фарҳанги миллии Иттифоқи нависандагони Тоҷикистон оид ба масъалаҳои таассубу хурофот ва зиёни он ба ҷомеа, сиёсикунонии дин ва оқибатҳои он, дин ва қонун, некӣ ва хайру савоб,  бетарафӣ ва оқибатҳои ҷанги шаҳрвандӣ, масҷидҳо ва нақши онҳо дар ҷомеа, ҳаҷ ва моҳияти он, симои миллӣ ва либоси миллӣ, савоб ва моҳияти он, Ислом, тараққиёт ва таассуб, экстремизм, амалҳои террористӣ ва оқибатҳои он,  таҳдиду хатари он ба арзишҳои миллӣ, амният ва суботи сиёсӣ, тамомияти арзӣ ва Истиқлолияти давлатӣ ибрози назар намуданд.

Ректори донишкада ба меҳмонон барои ибрози андешаҳои солиму созанда, ки воқеан метавонад барои дар руҳияи худогоҳиву хештаншиносӣ, баланд бардоштани асолати миллӣ, пос доштани фарҳанги миллии миллати тамадунофари тоҷик ва ҳифзи арзишҳои умумибашарӣ тарбия намудани насли ҷавони ҷумҳурӣ заминаи мусоид фароҳам оварад, миннатдорӣ баён намуд.

АКС: Донишкадаи давлатии санъати тасвирӣ ва дизайни Тоҷикистон