БОРЖОМИ. Ин шаҳри курортӣ ва дорои чашмаи шифобахш дар Гурҷистон аст

Май 26, 2024 10:17

ДУШАНБЕ, 26.05.2024. /АМИТ «Ховар»/. Ин навбат рӯзноманигорони тоҷик ва фаъолону корбарони шабакаҳои иҷтимоӣ бо Боржоми — шаҳри истироҳатӣ дар Самтсхе-Джавахети ва қисмати марказии Гурҷистон шинос шуданд.

Шаҳр бо оби маъдании боржомии худ маъруф буда, дар Гурҷистон аз рӯи содирот мақоми аввалро ишғол кардааст.

Ин оби шифобахш на танҳо дар Гурҷистон, балки дар дигар давлатҳои Иттиҳоди давлатҳои мустақил низ маъмулу машҳур ва мавриди истифодаи васеъ қарор гирифтааст.

Фирӯза. Хонаи Мирзо Ризо-хон- ёдгории таърихии асри XIX

Ҳангоми қадам задан ва наздик шудан ба чамшаи оби Боржоми диққати ҳамагонро хонаи қадимӣ ва дар айни ҳол устувору зебо бо кандакории ҷолиб ҷалб менамояд. Хонаи Мирзо Ризо-хон ёдгории меъмории асри 19 ба шумор меравад.

Ин ёдгорӣ дар наздикии боғи марказии Боржоми ҷойгир буда, номи дуюми он Фирӯза (Бирюза) аст, зеро намои берунааш бо ҷузъиёти дорои ранги фирӯзагӣ оро ёфтааст. Ҳамзамон маълум гардид, ки ҳамсари Мирзо Ризо-хон Фирӯза ном дошта ва ӯ ин хонаро ба ӯ ҳадя намудааст. Ин аст, ки номи бино имрӯз Фирӯза унвон гирифта, пас аз марги соҳибхона ҳоло як қисмати бино чун меҳмонхона, қисмати дигар ҳамчун осорхона ва осоишгоҳ хизмат мекунад.

Хона соли 1892 аз ҷониби сафири генералии Эрон дар Тифлис Мирзо Ризо-хон сохта шуда, номи хона ва соли бунёди он дар нақшу нигоре, ки биноро зеб медиҳанд, кандакорӣ шудааст.

Боғи марказии Боржоми. Маконе, ки чашмаи шифобахш ҷорист

Боғ макони зебо, манзараҳои дилфиреб ва ҳавои тозаву муаттаре дорад, ки бо диданаш ҳар сайёҳ мафтун хоҳад шуд. Даромадан ба дохили боғ барои шаҳрвандони кишвар 2 лари ва барои хориҷиён 5 лари аст, ки ин 1,80 долларро ташкил медиҳад. Дар як тарафи боғ дарёча равон буда, ҳама ҷо сабзу зебо аст ва дарахтони азимҷуссаи сабз ба чашм мерасад.

Дар дохили боғ чашмаи Боржоми ҷорӣ аст, ки ҳар сайёҳи омада аз он менӯшад ва қабл аз даромадан ба боғ қад-қади роҳ мардуми маҳаллӣ барои бо худ бурдани оби ин чашма ба сайёҳон обгирак мефурӯшанд.


Таъми оби чашма монанд ба оби маъдании Шоҳамбарии мо аст ва таркиби элементии он низ ҳамон аст. Яъне, он фоидае, ки бо нӯшидани шоҳамбарӣ беморони узвҳои ҳозима ба даст меоранд, нӯшидани Боржоми низ ба ин беморон манфиати хуб дорад. Тавре сокинони маҳаллӣ таъкид намуданд, нӯшидани ин об набояд барзиёд бошад, чун таркиби элементнокияш таъсири зиёд дошта, касро метавонад беҳол намояд.

Саг — дӯсти вафодори ҳар гурҷӣ

Он чӣ ки нигоҳи ҳар сайёҳро ба худ ҷалб мекунад, ин шумораи зиёди сагҳо дар гӯшаву канори ин шаҳр ва дигар минтақаҳои атрофаш аст. Гуҷиҳо нисбат ба саг муносибати хосса доранд. Дар ҳар кӯчаву хиёбонҳои шаҳр шумораи зиёди ин ҳайвони хонагиро метавонӣ бубинӣ. Сагҳои инҷо беозор ҳастанд.

Тавре аз забони сокинони маҳаллӣ фаҳмидем, дар ин ҷо ҳамаи сагҳо дар рӯйхат буда, онҳоро бар зидди бемории ҳорӣ сӯзандорӣ гузаронидаанд. Дар гӯши сагҳо метавон як асбобе (чип)-ро дид, ки ба қавли сокинон, он дорои тамоми маълумот нисбат ба ин ҳайвон буда, дар сурати гум шудан метавон ба зудӣ фаҳмид, ки соҳиби саг кисту суроғаи хонааш дар куҷост.

Дар қонунгузории гурҷиҳо барои нафароне, ки сагро озор медиҳанд ва ё аз хонаи худ берун мекунанд, ҷавобгарии маъмурӣ ҷорӣ карда шудааст. Онҳо чунин мешуморанд, ки сагҳо ҳайвонҳои вафодоранд ва будани онҳо дар ҳар хона хуб аст.

Шаҳлои САДРИДДИН,
Файзалӣ ҚУРБОНЗОДА,
АМИТ «Ховар»

Тифлис-Душанбе

АКС: АМИТ «Ховар»

Май 26, 2024 10:17

Хабарҳои дигари ин бахш

Имрӯз ҳаво дар водиҳои Тоҷикистон то 44 дараҷа гарм мешавад
Муовини Сарвазири Тоҷикистон бо вазъи соҳаи кишоварзии шаҳри Турсунзода шинос шуд
Дар Хатлон беш аз 2,8 ҳазор қонуншиканӣ дар соҳаи истифодаи нерӯи барқ ошкор шудааст
Филми «Дар талоши ҳақиқат» дар Синамоҷашнвораи байналмилаии давлатҳои аъзои СҲШ бо ҷойзаи махсус қадрдонӣ шуд
Дар Техас шумораи ҳалокшудагон бар асари обхезӣ ба 80 нафар расид
Дар Суғд ба масофаи 665 метр корҳои соҳилмустаҳакамкунӣ анҷом дода шуд
Имрӯз ҳаво дар шаҳри Душанбе то 41 дараҷа гарм мешавад
Дар Китобхонаи миллии Тоҷикистон бахшида ба Рӯзи маъюбон ҳамоиш доир шуд
«САМУРАЕ, КИ ШАМШЕР НАДОРАД». Асари нависандаи ҷопонӣ тарҷума ва нашр гардид
Имсол дар Тоҷикистон дар беш аз 186 ҳазор гектар кишти такрории зироати кишоварзӣ гузаронида мешавад
Кишоварзони ноҳияи Зафаробод дар беш аз 10 ҳазор гектар пунбадона кишт намуданд
Дар Тоҷикистон беш аз 11 ҳазор гектар шолӣ кишт шудааст